வலங்கைமானில் மாதர் சங்கத்தினர் ஆர்ப்பாட்டம்

திருவாரூர் மாவட்டம், வலங்கைமான் ஊராட்சி ஒன்றிய அலுவலகம் முன்பு அனைத்திந்திய மாதர் சங்கம் சார்பில், அடிப்படை பிரச்னைகளைத் தீர்க்கக் கோரி ஆர்ப்பாட்டம் வியாழக்கிழமை நடைபெற்றது.
வலங்கைமான் ஊராட்சி ஒன்றியம், ஆதிச்சமங்கலம் ஊராட்சி வேதாம்பரை கிராமத்தில் நத்தம் வழியாகச் செல்லும் தார்ச்சாலையை சீரமைக்க வேண்டும், ஆதிச்சமங்கலம் வழியாக வேதாம்பரை செல்லும் சுள்ளான் ஆற்றின் சுற்றுப்பாலத்தை சீரமைத்திட வேண்டும் மற்றும் குடிமனைப்பட்டா இல்லாத குடும்பங்களுக்கு பட்டா வழங்க வேண்டும் உள்ளிட்ட கோரிக்கைகளை வலியுறுத்தி, இந்த ஆர்ப்பாட்டம் நடைபெற்றது.
ஆர்ப்பாட்டத்துக்கு மாதர் சங்க ஒன்றியச் செயலாளர் சந்திரோதயம் தலைமை வகித்தார். மாநிலக்குழு உறுப்பினர் கலைச்செல்வி சிறப்புரையாற்றினார். மாவட்டத் தலைவர் சுமதி, செயலாளர் கோமதி உள்ளிட்ட பலர் கலந்துகொண்டு, கோரிக்கைகளை வலியுறுத்தி முழக்கமிட்டனர்.