பொதுமக்கள் எதிர்ப்பு;  எண்ணெய் குழாய் பதிக்கும் பணி நிறுத்தம்

திருவாரூர் அருகே எண்ணெய் நிறுவனம் சார்பில் மேற்கொள்ளப்பட்ட குழாய் பதிக்கும் பணிக்கு விவசாயிகள் மற்றும் பொதுமக்கள் எதிர்ப்பு தெரிவித்து, போராட்டத்தில் ஈடுபட்டதையடுத்து குழாய் பதிக்கும் பணி வியாழக்கிழமை நிறுத்தப்பட்டது.
திருவாரூர் அருகே கூடூர் ஊராட்சி, முக்குளத்தில் ஓஎன்ஜிசி நிறுவனம் சார்பில் விளை நிலங்களில் எண்ணெய் குழாய் பதிக்கும் பணிகள் மேற்கொள்ளப்பட்டு வருகின்றன. 
இப்பணிகள் வெள்ளக்குடியில் தொடங்கி அடியக்கமங்கலம் வரை பல்வேறு கிராமங்கள் வழியாக நடைபெற்று வருகின்றன.
இந்நிலையில், விளை நிலங்களில் பதிக்கப்படும் குழாய்களில் கசிவு ஏற்படும்போது விளை நிலங்கள் பாதிக்கப்படுவதாக எதிர்ப்புத் தெரிவித்து, குழாய் பதிக்கும் பணிகள் பல்வேறு இடங்களில் கிராம மக்களால் தடுத்து நிறுத்தப்பட்டுள்ளன.
இதேபோல், முக்குளத்து பகுதியிலும் விளை நிலங்கள் பாதிக்கப்படும் எனக் கூறி, குழாய் பதிக்கும் பணிக்கு அப்பகுதி விவசாயிகள் மற்றும் பொதுமக்கள் எதிர்ப்பு தெரிவித்து வந்தநிலையில், வியாழக்கிழமை பணியை தடுத்து நிறுத்தி, போராட்டத்தில் ஈடுபட்டனர்.
இதையடுத்து, குழாய் பதிக்கும் பணியை நிறுத்திய ஊழியர்கள், அங்கிருந்து வெளியேறினர்.