மாற்றுத் திறனாளிகள் ஆசிரியர் தகுதித் தேர்வு பயிற்சிக்கு விண்ணப்பிக்கலாம்

திருவாரூர் மாவட்டத்தில், பார்வையற்ற மாற்றுத் திறனாளிகள் மே 28-ஆம் தேதிக்குள் ஆசிரியர் தகுதித் தேர்வு பயிற்சிக்கு விண்ணப்பித்து பயன்பெறலாம் என மாவட்ட ஆட்சியர் இல. நிர்மல்ராஜ் கேட்டுக்கொண்டுள்ளார்.
இதுகுறித்து அவர் வெளியிட்டுள்ள செய்திக் குறிப்பு: திருவாரூர் மாவட்டத்தில், இளநிலை கல்வியியல் ஆசிரியர் பயிற்சி பெற்ற பார்வையற்ற மாற்றுத் திறனாளிகளுக்கு கல்வித்துறை மூலம் ஆசிரியர் தகுதித் தேர்வுக்கான பயிற்சி அளிக்கப்படுகிறது. இதில், சேர்ந்து பயிற்சி பெற விரும்புவோர் விண்ணப்பத்துடன் சுய விவரக் குறிப்பு, இரண்டு மார்பளவு புகைப்படம், மாற்றுத் திறனாளிகளுக்கான தேசிய அடையாள அட்டை, கல்விச் சான்றிதழ், ஆதார் அட்டை மற்றும் குடும்ப அட்டை ஆகியவற்றின் நகலுடன் மாவட்ட மாற்றுத் திறனாளிகள் நல அலுவலர், அறை எண். 6, மாவட்ட ஆட்சியர் அலுவலக வளாகம், திருவாரூர்-610004 என்ற முகவரிக்கு நேரடியாக அல்லது தபால் மூலமாக மே 28-ஆம் தேதிக்குள் விண்ணப்பித்து பயன்பெறலாம்.