ஐநா கொள்கைகள் குறித்து பள்ளியில் விழிப்புணர்வு முகாம்

திருவாரூர் சாய்ராம் மெட்ரிகுலேஷன் மேல்நிலைப் பள்ளியில் இந்திய நூலக இயக்கம் சார்பில், ஐநாவின் கொள்கைகள் குறித்த விழிப்புணர்வு முகாம் அண்மையில் நடைபெற்றது. 
2015-ஆம் ஆண்டு நடைபெற்ற ஐநா சபைக் கூட்டத்தில், அனைத்து நாடுகளும் தன்னிறைவு பெற்ற நாடுகளாக மாறும் வகையில் 17 குறிக்கோள்கள் அறிவிக்கப்பட்டன. அதன் அடிப்படையில் அனைத்து நாடுகளும் தனது திட்டங்களை அறிவித்து, செயல்படுத்தி வருகின்றன. அந்த அறிவிப்பு வெளியிடப்பட்ட செப்.25-ஆம் தேதி ஆண்டுதோறும் கொண்டாடப்பட்டு வருகிறது. நிகழாண்டில் செப்.25 முதல் அக்.5-ஆம் தேதி வரை 10 நாள்கள் கொண்டாடப்பட்டது. அந்த வகையில், திருவாரூரில் உள்ள சாய்ராம் மெட்ரிகுலேஷன் மேல்நிலைப் பள்ளியில் 400-க்கும் மேற்பட்ட  குழந்தைகள், ஐநாவின் கொள்கைகளை உருவகப்படுத்தி அமர்ந்தனர். 
 இந்நிகழ்ச்சியில் பங்கேற்ற மைய நூலகர்கள் ஆண்டாள், ஆசைத்தம்பி ஆகியோர் மாணவர்களுக்கு ஐநாவின் 17 குறிக்கோள்கள் குறித்து விளக்கி கூறுகையில், ஐநா குறிக்கோள்களை மாணவர்களுக்கு விளக்கிக் கூறினர். அப்போது அவர்கள், ஐநாவின் குறிக்கோள்களில் ஒன்றான தூய்மையை ஒவ்வொரு மாணவர்களும் தங்கள் வீடுகளில் இருந்து தொடங்க வேண்டும். அத்துடன், பசித்தவர்களுக்கு உணவளிப்பது, தண்ணீரை மிச்சப்படுத்துவது, மின்சாரத்தை மிச்சப்படுத்துவது என ஐநாவின் மற்ற குறிக்கோள்களையும் நிறைவேற்ற வேண்டும் என்றனர்.
இந்நிகழ்ச்சிக்கான ஏற்பாடுகளை சாய்ராம் பள்ளி நிர்வாகி கோபு, முதல்வர் லட்சுமி அசோக், ஆசிரியை வி.சுபத்திரை ஆகியோர்  செய்திருந்தனர்.