முக்கொம்பு மேலணை சீரமைப்பு பணியை விரைந்து முடிக்க வலியுறுத்தல்

முக்கொம்பு மேலணையில் சீரமைப்பு பணியை விரைந்து முடிக்க வேண்டும்  என, இந்திய கம்யூனிஸட் கட்சி வலியுறுத்தியுள்ளது. 
திருவாரூரில் இந்திய கம்யூனிஸ்ட்கட்சியின் நகரக்குழு கூட்டம் புதன்கிழமை மாலை நடைபெற்றது. நகரச் செயற்குழு உறுப்பினர் வி.ரெகுபதி தலைமையில் நடைபெற்ற கூட்டத்தில் இந்திய கம்யூனிஸ்ட் கட்சியின் திருவாரூர் மாவட்டச் செயலாளரும், சட்டப்பேரவை முன்னாள் உறுப்பினருமான வை.சிவபுண்ணியம் பங்கேற்றுப்  பேசினார். 
கூட்டத்தில் நகரச் செயலாளர் எம்.ஏ.மாரியப்பன், விவசாயிகள் சங்க மாவட்டச் செயலாளர் பி.எஸ். மாசிலாமணி, கட்சியின் மாவட்ட நிர்வாகக்குழு உறுப்பினர் சி.பி.முருகானந்தம், நகர துணைச் செயலாளர் பழக்கடை எஸ்.செல்வம் உள்ளிட்ட நிர்வாகிகள் கலந்து கொண்டனர்.
தீர்மானங்கள்: அனைத்து துறைகளிலும் அதிகரித்து வரும் லஞ்சம், ஊழல்போன்ற முறைகேடுகளுக்கு  முடிவு கட்ட, இந்திய கம்யூனிஸ்ட் கட்சியும், ஏ.ஐ.டி.யு.சி. யும் இணைந்து அரசியல் அமைப்புச் சட்டத்தை பாதுகாப்போம், இந்தியாவை பாதுகாப்போம் என்ற முழக்கத்தை முன் வைத்து செப்.17 முதல் 23 வரை தமிழ்நாட்டின் 5 இடங்களில் இருந்து தொடங்க உள்ள பிரசார இயக்கத்தின் ஒருபகுதியாக, நாகை மாவட்டம், வேதாரண்யத்தில் 17-ஆம் தேதி காலை 10 மணிக்கு தொடங்கி மாலை 6 மணிக்கு திருவாரூருக்கு வரும் பயணக் குழுவை வரவேற்று, திருவாரூர் தெற்குவீதியில் பொதுக்கூட்டம்நடத்துவது,
செப். 23-ஆம் தேதி திருப்பூரில் நடைபெறும் பிரசார நிறைவு பொதுக் கூட்டத்துக்கு திருவாரூர் நகரக் குழுவின் சார்பில் 300 பேர் கலந்து கொள்வது உள்ளிட்ட தீர்மானங்கள் நிறைவேற்றப்பட்டன.
மேலும், திருவாரூர் மாவட்டத்தில் நெற்பயிர்கள் அனைத்தும் தண்ணீரின்றி கருகும் நிலையில் உள்ளதால், முக்கொம்பில் சீரமைப்பு பணிகளை விரைந்து முடித்து, காவிரியில் கூடுதல் தண்ணீர் திறக்க நடவடிக்கை எடுக்கக் கோருவது, விவசாயிகள் அனைவருக்கும் பயிர்க்கடன் வழங்க வேண்டும் எனக் கோருவது உள்ளிட்ட தீர்மானங்களும் நிறைவேற்றப்பட்டன.