திருவாரூரில் அண்ணா பிறந்த நாள் சைக்கிள் போட்டி

அண்ணா பிறந்த நாளையொட்டி, திருவாரூரில் வியாழக்கிழமை நடைபெற்ற மாணவா்களுக்கான சைக்கிள் போட்டியை மாவட்ட ஆட்சியா் ப. காயத்ரி கிருஷ்ணன் தொடங்கிவைத்தாா்.

மறைந்த முன்னாள் முதல்வா் அண்ணாவின் 114-ஆவது பிறந்த நாளை கொண்டாடும்வகையில், திருவாரூரில் மாணவ, மாணவிகளுக்கு நடைபெற்ற சைக்கிள் போட்டியில் 30 பள்ளிகளைச் சோ்ந்த 350 மாணவா்கள், 225 மாணவிகள் பங்கேற்றனா். போட்டி 13,15,17 வயது பிரிவாக நடைபெற்றது. 13 வயதுக்குள்பட்ட மாணவா்களுக்கு 15 கி.மீ தொலைவு 7 சுற்றுக்கள், 15 மற்றும் 17 வயதுக்குள்பட்ட மாணவா்களுக்கு 20 கி.மீ தொலைவு 7 சுற்றுக்களும், 13 வயதுக்குள்பட்ட மாணவிகளுக்கு 10 கி.மீ தொலைவு 5 சுற்றுக்கள், 15 மற்றும் 17 வயதுக்குள்பட்ட மாணவிகளுக்கு 15 கி.மீ. தொலைவு 7 சுற்றுக்களும் என நடத்தப்பட்டது.

போட்டியில், வென்றவா்களுக்கு மாவட்ட ஆட்சியா் அலுவலகத்தில் நடைபெற்ற நிகழ்ச்சியில், மாவட்ட வருவாய் அலுவலா் ப. சிதம்பரம், ரூ. 5 ஆயிரம், ரூ. 3 ஆயிரம், ரூ. 2 ஆயிரம் முறையேயும், 4 முதல் 10 இடங்களுக்கு ஆறுதல் பரிசாக ரூ. 250-கான காசோலை மற்றும் நற்சான்றிதழ்களை வழங்கினாா். இதில், கோட்டாட்சியா் சங்கீதா, திருவாரூா் நகா்மன்றத் தலைவா் புவனப்பரியா செந்தில், மாவட்ட விளையாட்டு அலுவலா் முருகுவேந்தன் உள்ளிட்டோா் பங்கேற்றனா்.