மாணவா்களுக்கு கல்லூரி காலங்கள் மிக முக்கியமானவை என மாவட்ட ஆட்சியா் தி. சாருஸ்ரீ அறிவுறுத்தினாா்.
திருவாரூா் திரு.வி.க. அரசு கலைக் கல்லூரியில் ஆதிதிராவிடா் நலத்துறை சாா்பில் வெள்ளிக்கிழமை நடைபெற்ற உயா்கல்வி வழிகாட்டல் நிகழ்ச்சியில் பங்கேற்று அவா் பேசியது:
கல்லூரி காலங்கள் மாணவா்களுக்கு மிக முக்கியமானவை. கல்லூரி காலத்தில் மாணவா்களாகிய நீங்கள், எந்தத் துறையில் முன்னேற வேண்டும் என்பதை தீா்மானித்துக் கொண்டு, அந்தக் குறிக்கோளை அடைய முயற்சிக்க வேண்டும். முந்தைய காலத்தை விட தற்போதைய காலத்தில் பள்ளிப் படிப்புக்குப் பிறகு கல்லூரிப் படிப்பு பயில பல்வேறு பாடப் பிரிவுகள், வாய்ப்புகள் உள்ளன.
மாவட்டத்திலுள்ள மத்திய பல்கலைக்கழகத்தில் பல்வேறு இளநிலை, முதுநிலை பாடப்பிரிவுகள் உள்ளன. இதை, மாணவ- மாணவிகள் பயன்படுத்திக்கொள்ள வேண்டும். போட்டித் தோ்வுகளில் வெற்றி பெறவும் நமக்கு அடிப்படையானது கல்லூரிப் படிப்பே. இந்த வாய்ப்பை முறையாகப் பயன்படுத்தி, வாழ்வில் முன்னேறுவதற்கான முயற்சிகளை மேற்கொள்ள வேண்டும் என்றா்.
நிகழ்வில், கோட்டாட்சியா் சங்கீதா, மாவட்ட ஆதிதிராவிடா் மற்றும் பழங்குடியினா் நலஅலுவலா் பெ. விஜயன், தனி வட்டாட்சியா் கு. பத்மா உள்ளிட்ட பலா் பங்கேற்றனா்.