திமுக விவசாயத்துக்கு எதிரான கொள்கை நிலைப்பாட்டையே எடுத்துவருகிறது

தமிழகத்தில் திமுக ஆட்சி அமையும்போதெல்லாம் டெல்டா மாவட்ட விவசாயத்துக்கு எதிரான கொள்கை நிலைப்பாட்டையே எடுத்துவருகிறது என குற்றஞ்சாட்டினாா் பாஜக மாநிலத் தலைவா் கே. அண்ணாமலை.

மன்னாா்குடியில் திங்கள்கிழமை நடைபெற்ற என் மண் என் மக்கள் நடைப்பயணத்தின் இறுதியில் அவா் பேசியது: திமுக ஆட்சி அமைந்து 2 ஆண்டு காலத்தில் 99 சதவீத தோ்தல் வாக்குறுதிகளை நிறைவேற்றிவிட்டதாக முதல்வா் ல்டாலின் நாள்தோறும் பேசி வருகிறாா்.

உதாரணத்துக்கு மன்னாா்குடி தொகுதியில் நம்மாழ்வாா் பெயரில் வேளாண் கல்லூரி, அரசு பொறியியல் கல்லூரி, சுற்றுவட்டச் சாலை, டிஜிட்டல் நூலகம், ஜவுளி பூங்கா ஆகியவை கொண்டுவரப்படும் என்றனா். இதில் ஒன்றாவது நிறைவேற்றியுள்ளதா.

தமிழகத்தில் திமுக ஆட்சி அமையும்போதெல்லாம் டெல்டா மாவட்ட விவசாயத்துக்கு எதிரான கொள்கை நிலைப்பாட்டையே எடுத்துவருகிறது. கா்நாடகத்தில் காவிரியின் குறுக்கே 4 அணைகள் கட்டப்பட்ட போது திமுக ஆட்சி அதை தடுக்கவில்லை, மீத்தேன் எடுக்க கையெழுத்திட்டவா் ஸ்டாலின்தான். காவிரி நதி நீா் பிரச்னையில் தமிழகத்தின் உரிமையை விட்டுக்கொடுத்தவா் மு. கருணாநிதி.

நெல்லுக்கான ஆதார விலையை 67 சதவீதமாக உயா்த்தியது, டெல்டாவில் நிலக்கரி எடுக்கப்படும் என அறிவிப்பு வந்த 24 மணி நேரத்தில் அதற்கு தடை விதித்தவா் பிரதமா் மோடி. உரமானியம், பயிா் கடன் உதவி, காவிரியின் குறுக்கே மேக்கேதாட்டுவில் புதிய அணை கட்ட அனுமதி மறுப்பு, காவிரி மேலாண்மை ஆணையம் அமைத்தது என காவிரி டெல்டா மாவட்ட விவசாயிகளின் நலன்காக்க பல்வேறு நலத்திட்டங்களை அறிவித்து செயல்படுத்தி வரும் மோடிதான் உண்மையான டெல்டா மாவட்டத்துக்காரா் என்றாா்.

கூட்டத்தில், பாஜக மாநிலப் பொதுச் செயலா் கருப்பு எம். முருகானந்தம், மாவட்டத் தலைவா் எஸ். பாஸ்கா், முன்னாள் மாவட்டத் தலைவா் சிவா உள்ளிட்டோா் பங்கேற்றனா்.