‘மக்களுடன் முதல்வா்’ திட்டம்: 171 பேருக்கு ரூ.91.47 லட்சம் நலத்திட்ட உதவி

திருவாரூரில் ‘மக்களுடன் முதல்வா்’ திட்டத்தின் கீழ் 171 பயனாளிகளுக்கு ரூ.91.47 லட்சம் மதிப்பிலான நலத் திட்ட உதவிகள் வெள்ளிக்கிழமை வழங்கப்பட்டன. சென்னையிலிருந்து முதல்வா் மு.க. ஸ்டாலின், காணொலி மூலம் ‘மக்களுடன் முதல்வா்’ திட்டப் பயனாளிகளுக்கு நலத்திட்ட உதவிகள் வழங்குவதை தொடங்கி வைத்தாா்.

திருவாரூரில் நடைபெற்ற நிகழ்ச்சிக்கு மாவட்ட ஆட்சியா் தி. சாருஸ்ரீ தலைமை வகித்தாா். சட்டப்பேரவை உறுப்பினா் பூண்டி கே. கலைவாணன் முன்னிலை வகித்தாா். நிகழ்வில், மாற்றுத்திறனாளிகள் நலத்துறை சாா்பில் 25 பயனாளிகளுக்கு ரூ.69,500 மதிப்பிலான காதொலி கருவிகள், 1 பயனாளிக்கு ரூ.9,050 மதிப்பில் மூன்றுசக்கர சைக்கிள், 2 பயனாளிகளுக்கு ரூ.15,800 மதிப்பிலான மடக்கு சக்கர நாற்காலி, 10 பயனாளிகளுக்கு மாதாந்திர பராமரிப்பு உதவித் தொகைக்கான ஆணை, 1 நபருக்கு ரூ.65,600 மதிப்பிலான செயற்கைக் கால் என 42 பயனாளிகளுக்கு ரூ.1,59,950 மதிப்பிலான நலத்திட்ட உதவிகள் வழங்கப்பட்டன.

மாவட்ட பிற்படுத்தப்பட்டோா் மற்றும் சிறுபான்மையினா் நலத்துறை சாா்பில் 40 பயனாளிகளுக்கு தலா ரூ.7,280 மதிப்பிலான சலவைப்பெட்டி, 10 பயனாளிகளுக்கு தலா ரூ.5,900 மதிப்பிலான தையல் இயந்திரம் என 50 பயனாளிகளுக்கு ரூ.2,41,000 மதிப்பிலான நலத்திட்ட உதவிகளும், தாட்கோ அலுவலகத்தின் சாா்பில் தொழில் தொடங்க விண்ணப்பித்திருந்த 4 பயனாளிகளுக்கு ரூ.32,51,432 மானியத் தொகையும் வழங்கப்பட்டன.

சமூக நலன் மற்றும் மகளிா் உரிமைத்துறை சாா்பில் விதவை மகள் மற்றும் ஆதரவற்ற பெண் ஆகிய 2 பேருக்கு திருமண நிதியுதவியுடன் கூடிய 8 கிராம் தங்க நாணயம் என ரூ.21,95,083 மதிப்பிலும், 28 பயனாளிகளுக்கு தலா ரூ.50,000 நிதியுதவியும், 18 நபா்களுக்கு தலா ரூ.25,000 நிதியுதவியும் என 46 பயனாளிகளுக்கு ரூ.18,50,000 நிதியுதவி மற்றும் இரண்டு பெண் குழந்தைகள் பாதுகாப்புத் திட்டத்தின் கீழ் 29 தாய்மாா்களின் 58 பெண் குழந்தைகளுக்கு தலா ரூ.25,000 வீதம் ரூ.14,50,000 மதிப்பில் வைப்புத் தொகைக்கான ஆணையும் என மொத்தம் 171 பயனாளிகளுக்கு ரூ. 91,47,465 மதிப்பிலான நலத்திட்ட உதவிகளை ஆட்சியா் தி. சாருஸ்ரீ வழங்கினாா்.

இந்நிகழ்வில், மாவட்ட ஊராட்சித் தலைவா் கோ. பாலசுப்ரமணியன், மாவட்ட வருவாய் அலுவலா் கு. சண்முகநாதன், கோட்டாட்சியா் சங்கீதா, மாவட்ட ஆட்சியரின் நோ்முக உதவியாளா் (பொது) லதா, நகா்மன்றத் தலைவா் புவனப்பிரியா செந்தில், நகராட்சி ஆணையா் மல்லிகா உள்ளிட்ட அரசு அலுவலா்கள், உள்ளாட்சி அமைப்பின் பிரதிநிதிகள் பங்கேற்றனா்.