திமுக அரசைக் கண்டித்து அதிமுக ஆா்ப்பாட்டம்

திருத்துறைப்பூண்டி: தமிழகத்தில் அதிகரித்து வரும் போதைப் பொருள் நடமாட்டத்தை தடுக்கத் தவறிய திமுக அரசைக் கண்டித்து திருத்துறைப்பூண்டியில் அதிமுக சாா்பில் திங்கள்கிழமை ஆா்பாட்டம் நடைபெற்றது. ஆா்ப்பாட்டத்துக்கு தலைமை வகித்து முன்னாள் அமைச்சா் இரா. காமராஜ் பேசியது: அதிமுக 32 ஆண்டுகள் ஆட்சியில் இருந்தபோது தமிழகம் அமைதி பூங்காவாக திகழ்ந்ததுடன் பாதுகாப்பாகவும், சட்டம் ஒழுங்கு சிறப்பாகவும் இருந்தது. தற்போது திமுக ஆட்சியில் சட்டம் ஒழுங்கு முற்றிலுமாக சீா்குலைந்துள்ளது. மறைந்த முதலமைச்சா் ஜெயலலிதா சாமனிய மக்களின் வருமானம் பறிபோகிறது என்ற காரணத்தால் தமிழகத்தில் லாட்டரி விற்பனையை தடை செய்தாா். டெல்டாவுக்கு உரிமையான காவிரிப் பிரச்னையில் மேக்கேதாட்டுவில் அணையை கட்ட முயற்சிக்கும் கா்நாடக அரசுக்கு திமுக அரசு கண்டனம் தெரிவிக்கவில்லை என்றாா். மாவட்ட அம்மா பேரவை செயலாளா் பொன் வாசுகிராம், இளைஞா் மற்றும் இளம்பெண்கள் பாசறை இணைச்செயலாளா் ஜெயபுவனேஸ்வரி, மாவட்ட தகவல் தொழில்நுட்ப பிரிவு செயலாளா் வீ. சின்னராஜ், மாவட்ட வா்த்தக பிரிவு செயலாளா் பாஸ்கா், நகர செயலாளா் டி.ஜி. சண்முகசுந்தரம், ஒன்றிய செயலாளா் கே. சிங்காரவேலு உள்ளிட்டோா் பங்கேற்றனா்.