நிலக்கரிச் சுரங்க முறைகேட்டில் ஹெச்.சி.குப்தாவுக்கு முக்கியப் பங்கு: சிபிஐ குற்றச்சாட்டு

நிலக்கரிச் சுரங்க முறைகேட்டில் மத்திய நிலக்கரி அமைச்சகத்தின் முன்னாள் செயலர் ஹெச்.சி.குப்தாவுக்கு முக்கியப் பங்கு உள்ளது என்று சிபிஐ குற்றம்சாட்டியது.

இதுதொடர்பான வழக்கில், தில்லி சிபிஐ சிறப்பு நீதிமன்ற நீதிபதி பரத் பராசர் முன்னிலையில் திங்கள்கிழமை, குற்றச்சாட்டுகள் பதிவு செய்யப்பட்டன. அப்போது, சிபிஐ தரப்பு வழக்குரைஞர் சஞ்சய் குமார் முன்வைத்த வாதம்:

நிலக்கரி அமைச்சகத்தின் முன்னாள் செயலரான ஹெச்.சி.குப்தா, நிலக்கரிச் சுரங்கங்களை ஒதுக்கீடு செய்வது தொடர்பான பரிசீலனைக் குழுவின் தலைவராகவும் பொறுப்பு வகித்துள்ளார். அப்போது அவர், பிரம்மபுத்திரா நிலக்கரிச் சுரங்கத்தை பிஎஸ்எம்பிஎல் நிறுவனத்துக்கு ஒதுக்கீடு செய்ய, பிரதமர் அலுவலகத்துக்கு தவறான வழிகாட்டுதல்களை அளித்துள்ளார்.

மேலும், குறிப்பிட்ட நிறுவனத்துக்கு நிலக்கரிச் சுரங்கத்தை ஒதுக்க, அப்போதைய நிலக்கரித் துறை இணையமைச்சர் தாசரி நாராயண ராவ் ஆட்சேபம் தெரிவித்தபோதும், அந்த நிறுவனத்துக்கு சுரங்கத்தை ஒதுக்க பரிந்துரைத்துள்ளார் என்று தெரிவித்தார்.

அதையடுத்து, நீதிபதி பரத் பராசர், விசாரணையை செவ்வாய்க்கிழமைக்கு ஒத்திவைத்து உத்தரவிட்டார்.