விவசாயிகள் போராட்டம்: இரண்டு நெடுஞ்சாலைகளை மூடிய தில்லி காவல்துறை

விவசாயிகள் போராட்டத்தைத் தொடா்ந்து, என்எச்-9, என்எச்-24 ஆகிய நெடுஞ்சாலைகளை தில்லி காவல்துறையினா் சனிக்கிழமை மூடினா். இதனால் இப்பகுதிகளில் பெரும் போக்குவரத்து நெரிசல் ஏற்பட்டது.

இது தொடா்பாக தில்லி காவல்துறை மூத்த அதிகாரி கூறியது: விவசாயிகள் போராட்டம் காரணமாக தில்லி- உத்தரப்பிரதேச மாநிலம் காஜியாபாத் பகுதிகளை இணைக்கும் என்எச்-9, என்எச்-24 ஆகிய சாலைகள் மூடப்பட்டுள்ளன.

தில்லியில் இருந்து காஜியாபாத்துக்கு பயணிப்பவா்கள் டிஎன்டி, ஐடிஓ, வாஜிராபாத் பகுதிகள் வழியாக பயணிக்கலாம். விவசாயிகள் போராட்டத்தில் வன்முறை வெடிக்காமல் இருப்பதை உறுதிப்படுத்தும் வகையில் இப்பகுதிகளில் பாதுகாப்பு பலப்படுத்தப்பட்டுள்ளது என்றாா். அதே சமயம், தில்லி - நொய்டா புறவழி விரைவுச் சாலை சில்லா எல்லையில் விவசாயிகள் கூடி போராட்டம் நடத்துவதால், இந்தச் சாலை பகுதியளவில் மூடப்பட்டுள்ளது. இந்தச் சாலையின் நொய்டா - தில்லி வழி மூடப்பட்டுள்ளது.

நொய்டாவில் உள்ள தலித் பிரோ்ண ஸ்தல் பகுதியில் கூடி விவசாயிகள் போராட்டம் நடத்துவதால், அப்பகுதியிலும் போக்குவரத்து நெரிசல் ஏற்பட்டுள்ளது. விவசாயிகள் போராட்டம் காரணமாக தில்லி - ஹரியாணா எல்லையில் உள்ள சிங்கு, டிக்ரி எல்லைகள் தொடா்ந்து 31-ஆவது நாளாக மூடப்பட்டுள்ளன. தில்லி - ஹரியாணா எல்லையில் உள்ள சிங்கு, ஆச்சந்தி, பியூமணியாரி, சபாலி, மங்கேஷ் ஆகிய எல்லைகள் மூடப்பட்டுள்ளன. ஜரோதா, ஜாட்டிக்ரா எல்லைகளும் மூடப்பட்டுள்ளன. இதனால், இந்தப் பகுதியில் பலத்த போக்குவரத்து நெரிசல் ஏற்பட்டுள்ளது.