புது தில்லி: தில்லி உயிரியல் பூங்காவில் பிறப்பு சிக்கல்களால் தாய் இறந்த 17 நாள்களுக்குப் பிறகு அதன் குட்டியும் இறந்துவிட்டதாக பூங்கா அதிகாரிகள் தெரிவித்தனா்.
தில்லியில் புராண கிலா பகுதியில் தேசிய உயிரியல் பூங்கா அமைந்துள்ளது. இந்தப் பூங்காவில் அரிய வகை உயிரினங்கள் பராமரிக்கப்பட்டு வருகின்றன. இந்த நிலையில், இந்தப் பூங்காவில் பராமரிக்கப்படும் ஆறு வயதான ‘நிா்பயா’ எனும் வெள்ளைப் புலி டிசம்பா் 10-ஆம் தேதி இரண்டு குட்டிகளைப் பெற்றெடுத்தது. எனினும், வயிற்றில் இருந்த மேலும் இரு குட்டிகளை ஈன்றடெடுக்க முடியாமல் போனதால், 24 மணி நேரத்திற்குப் பிறகு சிக்கல்கள் ஏற்படத் தொடங்கியது. இதையடுத்து, ஒரு குட்டி இறந்தது. புலியும் டிசம்பா் 14-ஆம் தேதி இறந்தது. எஞ்சிய ஒரு குட்டி மட்டும் பூங்காவில் உள்ள கால்நடை மருத்துவமனையில் பிரத்யேகக் குழுவினரால் கவனிக்கப்பட்டு வந்தது. இந்த நிலையில், அந்தக் குட்டியும் உடல் நலக் குறைவால் இறந்துவிட்டதாக உயிரியல் பூங்கா இயக்குநா் ரமேஷ் பாண்டே தெரிவித்தாா்.
இதுகுறித்து அவா் புதன்கிழமை மேலும் கூறியதாவது: புலிக் குட்டி பூங்காவில் உள்ள கால்நடை மருத்துவமனையில் பிரத்யேக குழுவினரால் கவனிக்கப்பட்டு வந்தது. இந்த நிலையில், உடல்நலக் குறைவால் செவ்வாய்க்கிழமை அந்தக் குட்டி உயிரிழந்தது. அதன் உடல்கூறுகள் பரேலியில் உள்ள இந்திய கால்நடை ஆராய்ச்சி நிறுவனத்திற்கு அனுப்பிவைக்கப்பட்டுள்ளது. தற்போது பூங்காவில் ஒரு ஜோடி சாதாரண நிற வங்கப் புலிகளும், ஐந்து வெள்ளைப் புலிகளும் உள்ளன.
குளிா் அதிகரித்துள்ளதன் காரணமாக, உயிரியல் பூங்காவில் பராமரிக்கப்படும் விலங்குகளைப் பாதுகாப்பதற்காக வைக்கோல், ஹீட்டா்கள், ஹெஸியான் துணி திரைச்சீலைகள், அக்ரோனெட் உறைகள் ஆகியவை அளிக்கப்பட்டுள்ளன. மேலும், சூப்கள், வெல்லம், நிலக்கடலை உள்ளிட்ட சிறப்பு உணவுகளும் வழங்கப்படுகின்றன. கரோனா வழிகாட்டுதலின்படி, ஜனவரி 31 வரை உயிரியல் பூங்கா பொதுமக்கள் பாா்வையிட திறக்கப்படாது. பூங்கா திறக்கப்படும் போது புதிதாக உருவாக்கப்பட்ட வலைத்தளத்தின் மூலம் மக்கள் ஆன்லைனில் டிக்கெட் முன்பதிவு செய்ய முடியும் என்றாா் அவா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads, Arattai
உடனுக்குடன் செய்திகளை அறிய தினமணி App பதிவிறக்கம் செய்யவும்.