செங்கல்பட்டுஆலை செயல்பாட்டுக்கு வந்தால் 6 மாதங்களில் 2 கோடி தடுப்பூசி: தில்லியில் தமிழக அமைச்சா் உறுதி

புது தில்லி: செங்கல்பட்டு எச்எல்எல் பயோடெக் தடுப்பூசி ஆலை செயல்பாட்டிற்கு வந்தால், ஆறு மாதங்களில் 2 கோடி தடுப்பூசிகள் தயாரிக்க முடியும். ஆலையை எடுத்து நடத்த தமிழக முதல்வா் விரும்பியுள்ள நிலையில், மத்திய அரசின் முடிவுக்காகக் காத்திருக்கிறோம் என்று நாடாளுமன்ற திமுக குழுத் தலைவா் டி.ஆா். பாலு, தமிழகத் தொழில் துறை அமைச்சா் தங்கம் தென்னரசு ஆகியோா் தில்லியில் தெரிவித்தனா்.

செங்கல்பட்டு மாவட்டம், திருக்கழுக்குன்றத்தில் எச்எல்எல் பயோடெக் தடுப்பூசி நிறுவனம் செயல்படாமல் உள்ளது. இதை தமிழக அரசு ஏற்று நடத்த அனுமதி கேட்டு முதல்வா் மு.க. ஸ்டாலின் பிரதமருக்கு கடிதம் எழுதியுள்ளாா். இந்தக் கோரிக்கையை நேரடியாக வலியுறுத்துவதற்காக, பிரதமா் நரோந்திர மோடி, மத்திய சுகாதாரம் மற்றும் குடும்ப நலத் துறை அமைச்சா் ஹா்ஷ் வா்தன் ஆகியோரைச் சந்திக்க நாடாளுமன்ற திமுக குழுத் தலைவா் டிஆா். பாலு, அமைச்சா் தங்கம் தென்னரசு ஆகிய இருவரும் தில்லி வந்தனா். பிரதமரும், சுகாதாரத் துறை அமைச்சரும் மற்ற பணிகளில் இருந்ததால், ரயில்வே மற்றும் தொழில், வா்த்தகத் துறை அமைச்சா் பியூஷ் கோயலை சந்திக்க மத்திய அரசுத் தரப்பில் ஏற்பாடு செய்யப்பட்டது.

இதையடுத்து, மத்திய வா்த்தகத் துறை அலுவலகத்தில் அமைச்சா் பியூஷ் கோயலை டிஆா். பாலுவும், அமைச்சா் தென்னரசும் வியாழக்கிழமை சந்தித்தனா். இதன் பிறகு இருவரும் கூட்டாக செய்தியாளா்களை சந்தித்துப் பேசினா். அப்போது அவா்கள் கூறியது வருமாறு: செங்கல்பட்டில் உள்ள எச்எல்எல் பயோடெக் தடுப்பூசி நிறுவனம், மத்திய அரசின் எச்எல்எல் லைஃப்கோ் லிமிடெட் நிறுவனத்தின் துணை நிறுவனமாகும். செயல்பாடில்லாமல் இருந்து வரும் இந்த நிறுவனத்தை தமிழக அரசு ஏற்று நடத்த முடியுமா என்பது குறித்து கலந்து ஆலோசிப்பதற்காக எங்களை முதல்வா் அனுப்பியுள்ளாா். இது தொடா்பாக அமைச்சா் பியூஷ் கோயலை சந்தித்து ஆலோசனை நடத்தினோம். அப்போது, மத்திய உரம் மற்றும் ரசாயனத் துறை இணையமைச்சா் மன்சூக் மாண்டவியாவும் உடனிருந்தாா். இந்த ஆலையை தமிழக அரசு எடுத்து நடத்த முடியுமா என்பது குறித்து ஆலோசித்தோம். இந்த ஆலையில் சுமாா் ரூ.300 கோடி வரை முதலீடு செய்ய வேண்டியுள்ளது. இந்த ஆலையை உடனடியாகத் தொடங்க வேண்டும் என்பது முதல்வரின் விருப்பமாக உள்ளது. இதை நிறைவேற்றுவதற்குத்தான் தில்லி வந்து அமைச்சா்களைச் சந்தித்தோம். இது தொடா்பாக ஒரு வாரத்தில் பதிலளிப்பதாக அமைச்சா் பியூஷ் கோயல் தெரிவித்துள்ளாா்.

பத்து தினங்களுக்கு முன்பு இந்த ஆலையை ஏற்று நடத்த விரும்புவா்களை அழைத்து மத்திய அரசு டெண்டா் விட்டது. ஆனால், யாரும் ஆா்வத்துடன் முன்வரவில்லை. இதில் உள்ள நிபந்தனைகளை யாராலும் ஏற்றுக் கொள்ள முடியாத நிலையும் ஒரு காரணமாகும். இதனால் காலதாமதமாகிறது. ஆனால் பேச்சுவாா்த்தை நடத்தி வருவதாக மத்திய அரசு கூறுகிறது. இதில் தமிழக அரசுக்கு வழங்குவதா அல்லது வேறு யாருக்காவது அனுமதியளிப்பதா என்பது குறித்து மத்திய அரசு முடிவு எடுக்கும். மத்திய சுகாதாரம் மற்றும் குடும்ப நலத் துறை அமைச்சா், உலக சுகாதார அமைப்பின் கூட்டத்தில் பங்கேற்க இருப்பதால், அவா் இந்தச் சந்திப்பில் இடம் பெறவில்லை. இந்த விஷயத்தில் நிச்சயமாக ஒரு முடிவு எடுக்கப்படும். அது எந்த வகையில் இருந்தாலும், தமிழக அரசு வரவேற்கும். பொதுவாக இந்த ஆலையை ஏற்று நடத்த இதுவரை யாரும் முன்வந்ததாகத் தெரியவில்லை. ஆனால், மூன்று நிறுவனங்கள் பேசிக் கொண்டிருப்பதாக மத்திய அமைச்சா் எங்களிடம் தெரிவித்தாா். செங்கல்பட்டு தடுப்பூசி ஆலை தொடா்பாக தமிழக அரசின் திட்ட முன்மொழிவுகலை அளித்துள்ளோம். இந்த விஷயத்தில் ஆராய்ந்து விரைந்து முடிவெடுப்பதாக அமைச்சா் பியூஷ் கோயல் தெரிவித்துள்ளாா்.

இந்த ஆலை செயல்பாட்டுக்கு வந்தால், ஆறு மாதங்களில் 2 கோடி தடுப்பூசிகளைத் தயாரிக்க வாய்ப்பு உண்டு. மேலும், ஓா் ஆண்டு காலத்தில் 8 கோடி தடுப்பூசி வரை தயாரிக்க முடியும். இந்த ஆலையை செயல்பாட்டுக்கு கொண்ட வருவதற்கான முதலீட்டுத் தொகை ஒரு பிரச்னை அல்ல. இந்த ஆலையை முதல்வா், நேரில் பாா்வையிட்ட பின்னா் உடனடியாக மத்திய அமைச்சா்களைச் சந்தித்துப் பேசும்படி எங்களிடம் கூறினாா். தடுப்பூசி வழங்குவதன் மூலமே கரோனா தொற்றிலிருந்து மக்களைக் காப்பாற்ற முடியும் என தமிழக முதல்வா் நினைக்கிறாா். இதனால், தடுப்பூசி தயாரிப்பை துரிதப்படுத்த வேண்டும் என்பதே அவரது குறிக்கோளாக உள்ளது. இன்னும் இரண்டு நாள்களில் தமிழகத்தில் தடுப்பூசி முடியவடைய உள்ளது. கரோனா நோய்த் தடுப்பு பணிகளில் தமிழகத்திற்கு மத்திய அரசு முடிந்தளவிற்கு உதவி கொண்டிருக்கிறது என்றனா் அவா்கள்.

செங்கல்பட்டு தடுப்பூசி ஆலைய தமிழக அரசு ஏற்று நடத்துவது தொடா்பாக பிரமருக்கு முதல்வா் மு.க.ஸ்டாலின் எழுதியிருந்த கடித்தின் நகலையும் அமைச்சா் பியூஷ் கோயலிடம் அவா்கள் அளித்தனா்.