சுகாதார வசதியில் கிராமப்புற, நகா்ப்புற வேறுபாடு குறைய வேண்டும்: கருத்தரங்கில் பிரதமா் மோடி வலியுறுத்தல்

நகா்ப்புறத்துக்கும், கிராமப்புறத்துக்கும் இடையிலான சுகாதார வசதிகளின் வேறுபாட்டை குறைக்க வேண்டும் என்று பிரதமா் நரேந்திர மோடி கேட்டுக் கொண்டாா்.

இதை முன்னிட்டு ஒவ்வொரு கிராமத்துக்கும், 5ஜி, கண்ணாடி இழை போன்ற தகவல் தொழில் நுட்ப கட்டமைப்புத் திட்டங்களை மத்திய அரசு மேற்கொண்டு வருவதாகவும், இது இடைவெளியைக் குறைக்கும் எனவும் பிரதமா் தெரிவித்தாா்.

மத்திய நிதிநிலை அறிக்கைக்கு பிந்தைய கருத்தரங்குகள் மத்திய அரசின் துறைவாரியாக நடைபெற்று வருகிறது. ஐந்தாவது மெய்நிகா் வழி கருத்தரங்காக சுகாதாரம் மற்றும் குடும்ப நலத் துறை தொடா்பாக நடை பெற்றது. இந்த இணையவழிக் கருத்தரங்கை பிரதமா் நரேந்திர மோடி சனிக்கிழணை தொடக்கி வைத்துப் பேசினாா். மத்திய சுகாதாரத் துறை அமைச்சா்கள், அரசு, தனியாா் துறைகளைச் சாா்ந்த மருத்துவா்கள், சுகாதார மேலாண்மை, தொழில்நுட்பம் மற்றும் ஆய்வுப் பிரிவினா் பங்கேற்ற இந்த நிகழ்ச்சியில் பிரதமா் மோடி பேசியது வருமாறு: மத்திய அரசு கடந்த 7 ஆண்டுகளாக சுகாதாரத் துறையில் மேற்கொள்ளப்பட்ட சீா்திருத்தங்கள் மற்றும் மாற்றத்தின் அடிப்படையில் மத்திய நிதிநிலை அறிக்கையில் சுகாதாரத் துறைக்கு பல்வேறு திட்டங்கள் தயாரிக்கப்பட்டுள்ளன. தற்போது சுகாதார மருத்துவம் மட்டுமின்றி, அதற்கு சமமாக ஆரோக்கியத்திலும் கவனம் செலுத்தி ஒரு முழுமையான அணுகுமுறையை மேற்கொள்கிறோம்.

இதில் அனைவரையும் உள்ளடக்கிய சுகாதார முயற்சியில் மூன்று அம்சங்கள் முக்கியமானதாகும். முதலாவதாக, நவீன மருத்துவ அறிவியல் தொடா்பான உள்கட்டமைப்பு மற்றும் மருத்துவ மனித வளங்களை விரிவுபடுத்துவது. இரண்டாவதாக, ஆயுஷ் போன்ற பாரம்பரிய இந்திய பாரம்பரிய மருத்துவ முறை ஆராய்ச்சியை மேம்படுத்தி அவற்றை அன்றாட சுகாதார முறைகளில் பயன்படுத்துவது. மூன்றாவதாக, நாட்டின் ஒவ்வொரு மூலை முடுக்குகளில் உள்ள அனைத்து மக்களுக்கும் குறைந்த செலவில் மருத்துவ வசதிகள் கிடைக்கச் செய்வது. இதற்கு நவீன, எதிா்கால தொழில்நுட்பங்களைப் பயன்படுத்த வேண்டும். முக்கியமாக மருத்துவ வசதிகள், வட்டார அளவிலும், மாவட்ட அளவிலும், கிராமங்களுக்கு அருகிலேயே கிடைக்கச் செய்ய வேண்டும். இதற்கான உள்கட்டமைப்பு வசதிகளை மேம்படுத்தப்படுவது முக்கியமாகும். இதில் தனியாா் துறையினரும், இதர துறைகளும் பங்கேற்க முன்வர வேண்டும்.

‘ஒரே நாடு ஒரே சுகாதாரம்’ என்கிற முறையில் ஆரம்ப சுகாதார கட்டமைப்பை வலுப்படுத்த வேண்டும். இதற்கு 1.5 லட்சம் சுகாதார, நலவாழ்வு மையங்களை அமைக்கும் பணி முழுவீச்சுடன் நடைபெற்று வருகிறது. இதுவரை, 85 ஆயிரத்துக்கும் அதிகமான மையங்கள் மேற்கொள்ளப்பட்டுள்ளன. நிதிநிலை அறிக்கையில் மனநல சுகாதார வசதிகளும் சோ்க்கப்பட்டுள்ளன. மருத்துவ மனித வளத்தை மேம்படுத்த கடந்த ஆண்டைவிட, இந்த முறை நிதிநிலை அறிக்கையில் மருத்துவக் கல்வி மற்றும் மனிதவள மேம்பாடு தொடா்பான சேவைகளுக்கு கணிசமான அளவுக்கு நிதி ஒதுக்கீடு அதிகரிக்கப்பட்டுள்ளது. நவீன தொழில்நுட்பத்தின் உதவியுடன், மருத்துவத்தில் சீா்திருத்தங்களை முன்னெடுத்துச் செல்லும் பணிகளில் தரமான மருத்துவக் கல்வியை மேம்படுத்துவது, அது குறைந்த செலவில் அனைவருக்கும் கிடைக்கச் செய்வது உள்ளிட்டவற்றைக் நோக்கமாக கொண்டும் இருக்க வேண்டும்.

மருத்துவக் கல்வி பயில சிறிய நாடுகளுக்குக்கூட இந்திய மாணவா்கள் செல்கின்றனா். இதனால், கோடிக்கணக்கான ரூபாய் நாட்டைவிட்டு வெளியே போகிறது. இதில் நமது தனியாா் துறையினா் ஏன் பெருமளவில் பங்கேற்கக் கூடாது? மாநில அரசுகளும் இதற்கு நிலங்களை ஒதுக்குவதில் சிறந்த கொள்கையை வகுக்க வேண்டும். கொவைட் -19 போன்ற நோய்த் தொற்றுகளில் டிஜிட்டல் மருத்துவ தீா்வுகள் உலக அளவில் இந்தியாவின் மதிப்பை, உயா்த்தியது. நிதிநிலை அறிக்கையில் ஆயுஷ்மான் பாரத் டிஜிட்டல் சுகாதார இயக்கம் தொடங்கப்பட்டுள்ளது. இது நுகா்வோருக்கும் (நோயாளிகளுக்கும்), சுகாதார சேவை வழங்குவோருக்கும் இடையே ஒரு சுலபமான இணைப்பை வழங்கும். இந்த மின்னணு முறை இரு தரப்புக்கும் இடையே தொடா்பை ஏற்படுத்தி, நாட்டில் மருத்துவ சிகிச்சை மிகவும் எளிதாக்கி குறைந்த செலவில் மருத்துவ சிகிச்சை கிடைக்கவும் வகை செய்யவுள்ளது. இது மட்டுமல்லாமல், இந்தியாவின் தரமான சிகிச்சையை சா்வதேசத்தினரும் பெறுவதற்கான வாய்ப்பை ஆயுஷ்மான் பாரத் டிஜிட்டல் இயக்கம் ஏற்படுத்துகிறது.

கரோனா பெருந்தொற்று காலத்தில் தொலை தூர மருத்துவ வசதி ஆக்கபூா்வமாகப் பங்காற்றியது. இது மேலும் வளா்ந்து நகா்ப்புறத்துக்கும், கிராமப்புறத்துக்கும் இடையிலான சுகாதார பாகுபாட்டை இந்த தொழில்நுட்பங்கள் குறைக்க வேண்டும். இதற்காகவே ஒவ்வொரு கிராமத்துக்கும், தொலைதொடா்பில் 5ஜி கட்டமைப்பு. கண்ணாடி இழை கட்டமைப்புத் திட்டம் மேற்கொள்ளப்பட்டு வரப்படுகிறது. இதில் தனியாா் துறையினா் தங்களது பங்களிப்பை அதிகரிக்க முன்வர வேண்டும். மருத்துவ நோக்கங்களுக்கு ட்ரோன் தொழில்நுட்பத்தையும் பயன்படுத்துவதும் அவசியம் என பிரதமா் மோடி வலியுறுத்தினாா்.