ஓபிஎஸ் மனு மீது 3 வாரங்களில் விசாரித்து முடிவு: உயா்நீதிமன்றத்திற்கு உச்சநீதிமன்றம் அறிவுறுத்தல்

கடந்த ஜூலை 11-ஆம் தேதி நடைபெற்ற அதிமுக பொதுக்குழுக் கூட்டத்திற்கு அனுமதி அளித்து சென்னை உயா்நீதிமன்றத் தனி நீதிபதி பிறப்பித்த உத்தரவை எதிா்த்து ஓ.பன்னீா்செல்வம் (ஓ.பி.எஸ்.), பி.வைரமுத்து ஆகியோா் தாக்கல் செய்த மேல்முறையீட்டு மனுக்கள் மீது வெள்ளிக்கிழமை விசாரணை நடத்திய உச்சநீதிமன்றம், இந்த விவகாரத்தை 3 வாரங்களில் விசாரித்து சென்னை உயா்நீதிமன்றத்தின் தனி நீதிபதி முடிவு காணுமாறு கேட்டுக் கொண்டுள்ளது.

மேலும், கட்சி விவகாரங்களில் ஓபிஎஸ், இபிஎஸ் இரு தரப்பினரும் தற்போதைய நிலையைத் தொடர வேண்டும் என்றும் உச்சநீதிமன்றம் தெளிவுபடுத்தியுள்ளது. கடந்த ஜூலை 11-ஆம் தேதி அதிமுக பொதுக்குழுவை கூட்ட சென்னை உயா்நீதிமன்றம் அனுமதி அளித்திருந்தது. இக்கூட்டத்தில் அதிமுக இடைக்கால பொதுச் செயலாளராக எடப்பாடி கே. பழனிசாமி (இபிஎஸ்) தோ்ந்தெடுக்கப்பட்டிருந்தாா். ஓ.பன்னீா்செல்வத்தை கட்சியிலும், பொறுப்பிலும் இருந்து நீக்குவது உள்பட பல்வேறு தீா்மானங்கள் இக்கூட்டத்தில் நிறைவேற்றப்பட்டன.

முன்னதாக, அதிமுக பொதுக்குழுவுக்கு தடை விதிக்கக் கோரி ஓபிஎஸ் தரப்பில் சென்னை உயா்நீதிமன்றத்தில் தாக்கல் செய்யப்பட்டிருந்த மனுவை விசாரித்த நீதிபதி கிருஷ்ணன் ராமசாமி, பொதுக்குழு நடத்தத் தடை இல்லை என்று உத்தரவு பிறப்பித்திருந்தாா். இந்த உத்தரவை எதிா்த்து ஓ. பன்னீா்செல்வம் கடந்த ஜூலை 13-ஆம் தேதி உச்சநீதிமன்றத்தில் மேல்முறையீட்டு மனு தாக்கல் செய்தாா். ‘இந்தப் பொதுக்குழுக் கூட்டமானது ஒருங்கிணைப்பாளா் கையெழுத்து இல்லாமலும், உரிய அழைப்புக் கடிதம் அளிக்காமலும் நடைபெற்றுள்ளது. இதை உயா்நீதிமன்றம் கவனத்தில் கொள்ளவில்லை. இதனால், அந்த உத்தரவுக்கு தடை விதிக்க வேண்டும்’ என்று அதில் தெரிவிக்கப்பட்டுள்ளது.

இதே போன்று, அதிமுகவைச் சோ்ந்த பி.வைரமுத்து என்பவரும் மேல்முறையீட்டு மனு தாக்கல் செய்திருந்தாா். இதைத் தொடா்ந்து, எடப்பாடி பழனிசாமி, அதிமுக பொதுக் குழு, அதிமுக தலைமைக் கழக நிா்வாகிகள் ஆகியோா் தரப்பிலும் கேவியட் மனு தாக்கல் செய்யப்பட்டிருந்தது. இந்த மேல்முறையீடு வழக்கு உச்சநீதிமன்றத் தலைமை நீதிபதி என்.வி. ரமணா, நீதிபதிகள் கிருஷ்ண முராரி, ஹிமா கோலி ஆகியோா் அடங்கிய அமா்வு முன் வெள்ளிக்கிழமை விசாரணைக்கு வந்தது.

அப்போது, ஓ.பன்னீா்செல்வம் தரப்பில் மூத்த வழக்குரைஞா் குரு கிருஷ்ணகுமாா் ஆஜராகி, ‘கடந்த 11-ஆம் தேதி நடைபெற்ற பொதுக்குழுக் கூட்டத்தில் ஓ.பன்னீா்செல்வத்தை கட்சியில் இருந்து நீக்கியுள்ளனா். கடுமையான முடிவுகள் அக்கூட்டத்தில் எடுக்கப்பட்டன. மேலும், கட்சியின் விதிகளை மீறும் வகையில், தீா்மானங்களை நிறைவேற்றியுள்ளனா். கட்சியின் பொருளாளா் பதவியில் இருந்து ஓபிஎஸ்ஸை நீக்கியதுடன், அப்பதவியையும் எடுத்துவிட்டனா். மேலும், ஜூன் 23-ஆம் தேதி பொதுக் குழுவில் தீா்மானம் நிறைவேற்ற தடை விதித்த உயா்நீதிமன்ற உத்தரவுக்கு உச்சநீதிமன்றம் ஜூலை 6-ஆம் தேதி தடை விதித்தபோதிலும், அடுத்த பொதுக் குழுக் கூட்டம் சட்டவிதிகளின்படி நடைபெற வேண்டும் என்று தெரிவித்திருந்தது. ஆனால், கட்சி விதிகளுக்கு மாறாக ஜூலை 11-ஆம் தேதி பொதுக்குழுக் கூட்டம் நடைபெற்று தீா்மானங்கள் நிறைவேற்றப்பட்டன. இதனால், அந்தக் கூட்டத்தில் எடுக்கப்பட்ட முடிவுகளை தற்காலிகமாக நிறுத்திவைக்க வேண்டும். ஏனெனில், இன்றைக்கு அவா்கள் தரப்பு (இபிஎஸ்) அனுகூலமான நிலையில் உள்ளனா்’ என்று வாதிட்டாா்.

அப்போது, அஇஅதிமுக தலைமைக் கழகம் நிா்வாகிகள் தரப்பில் வழக்குரைஞா் பி.வினோத் கண்ணாவுடன் ஆஜரான மூத்த வழக்குரைஞா் ராகேஷ் த்விவேதி, ‘கடந்த ஜூலை 11-ஆம் தேதி நடைபெற்ற பொதுக்குழுக் கூட்டத்தில் 95 சதவீத உறுப்பினா்களின் ஒப்புதலுடன்தான் தீா்மானங்கள் நிறைவேற்றப்பட்டுள்ளன’ என்று வாதிட்டாா். இதையடுத்து,, ‘இந்த விவகாரத்தில் இரு தரப்பினரும் சமரசம் செய்ய வாய்ப்பிருக்கிா’ என்று தலைமை நீதிபதி கேட்ட போது, மூத்த வழக்குரைஞா் ராகேஷ் த்விவேதி, ‘அதற்கு வாய்ப்பில்லை’ என்றாா்.

பி.வைரமுத்து தரப்பில் ஆஜரான மூத்த வழக்குரைஞா் ரஞ்சித் குமாா், ‘கட்சி விதிகளின் நடைமுறைகளைப் பின்பற்றாமல் ஓபிஎஸ்ஸை நீக்கியுள்ளனா். இதனால், பொதுக்குழுக் கூட்டம் நடத்தப்பட்ட 11-ஆம் தேதிக்கு முன்பிருந்த நிலையே தொடரும் வகையில் நீதிமன்றம் உத்தரவிட வேண்டும்’ என்றாா். அதற்கு தலைமை நீதிபதி அமா்வு, ’அதுபோன்று நாங்கள் செய்ய முடியாது’ என கூறியது. மேலும், ஜூலை 6-ஆம் தேதி உச்சநீதிமன்ற விடுமுறைக்கால அமா்வு பிறப்பித்த சென்னை உயா்நீதிமன்ற இரு நீதிபதி அமா்வு பிறப்பித்த உத்தரவுக்கு தடை விதித்த உத்தரவை குறிப்பிட்ட தலைமை நீதிபதி அமா்வு, இந்த உத்தரவு காரணமாக உயா்நீதிமன்றத்தின் தனி நீதிபதி அமா்வு இந்த வழக்கு மீது உரிய வகையில் முடிவு செய்ய முடியவில்லை’ என்றது.

மேலும், ‘உயா்நீதிமன்ற அமா்வு தெரிவித்த சிரமங்களை கருத்தில் கொள்கிறோம். இந்த விவகாரங்களை உச்சநீதிமன்றத்தில் வைப்பதற்கு பதிலாக, நாங்கள் பிறப்பிக்கும் உத்தரவு மேலாதிக்கம் செய்யாமல், மறுபரிசீலனைக்காக இந்த விவகாரத்தை உயா்நீதிமன்றத்திற்கு திருப்பி அனுப்புகிறோம். மூன்று வார காலத்திற்குள் இந்த விவகாரத்தை முடித்துவைக்குமாறும் உயா்நீதிமன்றத்தைக் கேட்டுக்கொள்கிறோம். அந்தக் காலம் வரையிலும் வழக்கில் தொடா்புடையவா்கள் தற்போதைய நிலையையே பாரமரிக்க வேண்டும். தகுதியின் பேரில் எந்தக் கருத்தையும் நாங்கள் தெரிவிக்கவில்லை’ என்று தனி நீதிபதி அமா்வு உத்தரவிட்டது.

அஇஅதிமுக தரப்பில் மூத்த வழக்குரைஞா் சி.எஸ். வைத்தியநாதன், இபிஎஸ் தரப்பில் மூத்த வழக்குரைஞா் முகுல் ரோத்தகி, வழக்குரைஞா் பாலாஜி ஸ்ரீநிவாசன், பொதுக்குழு தரப்பில் மூத்த வழக்குரைஞா் ஆா்யமா சுந்தரம் உள்ளிட்டோா் ஆஜராகினா்.