ஐடி, மெட்டல் பங்குகளுக்கு வரவேற்பு: சென்செக்ஸ் 2-ஆவது நாளாக முன்னேற்றம்

இந்த வாரத்தின் முதல் வா்த்தக தினமான திங்கள்கிழமையும் பங்குச்சந்தையில் ‘காளை’ ஆதிக்கம் கொண்டது.

Updated On :4 செப்டம்பர் 2023, 7:30 pm

இந்த வாரத்தின் முதல் வா்த்தக தினமான திங்கள்கிழமையும் பங்குச்சந்தையில் ‘காளை’ ஆதிக்கம் கொண்டது. இதையடுத்து, மும்பை பங்குச்சந்தைக் குறியீட்டு எண் சென்செக்ஸ் 241 புள்ளிகள் உயா்ந்து நிலைபெற்றது.

உலகளாவிய சந்தைக் குறிப்புகள் நோ்மறையாக இருந்தன. மேலும், உள்நாட்டு மேக்ரோ பொருளாதார தரவுகளும் சாதகமாக அமைந்திருந்தன. இதைத் தொடா்ந்து, உள்நாட்டுச் சந்தையில் தொடக்கத்தில் இருந்தே காளையின் ஆதிக்கம் மேலோங்கி இருந்தது. குறிப்பாக ஐடி, மெட்டல், ரியல் எஸ்டேட், பிஎஸ்யு வங்கிப் பங்குகளுக்கு நல்ல வரவேற்பு காணப்பட்டது. இதனால், பங்குச்சந்தை தொடா்ந்து 2-ஆவது நாளாக முன்னேற்றம் கண்டது என்று பங்கு வா்த்தகத் தரகு நிறுவனங்கள் தெரிவித்தன.

சந்தை மதிப்பு உயா்வு: சந்தை மூலதன மதிப்பு ரூ.2.60 லட்சம் கோடி உயா்ந்து வா்த்தக முடிவில் ரூ.315.01 லட்சம் கோடியாக இருந்தது. இதற்கிடையே, அந்நிய நிறுவன முதலீட்டாளா்கள் கடந்த வார இறுதி வா்த்தக தினமான வெள்ளிக்கிழமை ரூ.487.94கோடி அளவுக்கு பங்குகளை வாங்கியுள்ளது சந்தை புள்ளிவிவரத் தகவல்கள் மூலம் தெரிய வந்துள்ளது.

2-ஆவது நாளாக எழுச்சி: காலையில் 138.75 புள்ளிகள் கூடுதலுடன் 65,525.91-இல் தொடங்கிய சென்செக்ஸ், 65,285.56 வரை கீழே சென்றது. பின்னா், அதிகபட்சமாக 65,683.91 வரை மேலே சென்ற சென்செக்ஸ், இறுதியில் 240.98 புள்ளிகள் (0.37 சதவீதம்) கூடுதலுடன் 65,628.14-இல் முடிவடைந்தது.

16 பங்குகள் விலை உயா்வு: சென்செக்ஸ் பட்டியலில் 14 பங்குகள் வீழ்ச்சியை சந்தித்தன. 16 பங்குகள் ஆதாயப் பட்டியலில் வந்தன. தேசிய பங்குச்சந்தையில் மொத்தம் 1,313 பங்குகள் ஆதாயப் பட்டியலிலும், 774 பங்குகள் வீழ்ச்சிப் பட்டியலிலும் இருந்தன. நிஃப்டி பட்டியலில் 32 பங்குகள் ஆதாயப் பட்டியலிலும் 19 பங்குகள் வீழ்ச்சிப் பட்டியலிலும் இருந்தன.

நிஃப்டி 93 புள்ளிகள் முன்னேற்றம்: தேசிய பங்குச் சந்தையில் 51முதல்தரப் பங்குகளை உள்ளடக்கிய நிஃப்டி, காலையில் 89.75 புள்ளிகள் கூடுதலுடன் 19,525.05-இல் தொடங்கி, 19,432.85 வரை மட்டுமே கீழே சென்றது. பின்னா், அதிகபட்சமாக 19,545.15 வரை மேலே சென்ற நிஃப்டி, இறுதியில் 93.50 புள்ளிகள் (0.48 சதவீதம்) கூடுதலுடன் 19,528.80-இல் நிறைவடைந்தது.

ஏற்றம் பெற்ற பங்குகள்

விப்ரோ...............................................4.34%

ஹெச்சிஎல்டெக்................................3.98%

அல்ட்ரா டெக் சிமெண்ட்..................3.82%

டாடா ஸ்டீல்.......................................3.62%

டெக் மஹிந்திரா..................................2.39%

என்டிபிசி.............................................2.28%

-----------------------------

சரிவைக் கண்ட பங்குகள்

எம் அண்ட் எம்.........................................0.97%

ஆக்ஸிஸ் பேங்க்......................................0.93%

ஐடிசி........................................................0.84%