மின்வாரிய ஊழியர் வீட்டில் 11 பவுன் நகை திருட்டு

கோவில்பட்டி அருகே மின்வாரிய ஊழியர் வீட்டில் சுமார் 11 பவுன் நகையை திருடிச் சென்ற மர்ம நபர்களை போலீஸார் தேடி வருகின்றனர்.

கோவில்பட்டியையடுத்த அத்தைகொண்டான் ஜெகஜோதி நகரைச் சேர்ந்த சாலமோன் மனைவி லலிதா (52). கயத்தாறில் உள்ள தமிழ்நாடு மின்சார வாரிய அலுவலகத்தில் வருவாய் மேற்பார்வையாளராகப் பணிபுரிந்து வருகிறார். இவர் மற்றும் இவரது குழந்தைகள் திங்கள்கிழமை வழக்கம் போல வீட்டை பூட்டிவிட்டுச் சென்றுவிட்டனர்.  இந்நிலையில், இவரது வீட்டுக்கு வந்த லலிதாவின் சகோதரர் லெனின், வீடு திறந்திருந்ததைக் கண்டு அதிர்ச்சியடைந்தாராம். பின்னர் சகோதரிக்கு தகவல்  தெரிவித்தாராம்.

இதையடுத்து அங்கு வந்த லலிதா வீட்டுக்குள் சென்று பார்த்த போது, பீரோவிலிருந்த சுமார் 11 பவுன் நகை திருடுப் போயிருப்பது தெரியவந்தது.  இதுகுறித்து அவர் அளித்த புகாரின் பேரில், மேற்கு காவல் நிலைய குற்றப்பிரிவு போலீஸார் வழக்குப் பதிந்து, நகையை திருடிச் சென்ற மர்ம நபர்களை தேடி வருகின்றனர்.