கோயில் உண்டியலை உடைத்து பணம் திருட்டு

மார்த்தாண்டம் அருகே கோயில் உண்டியலை உடைத்து பணம் திருடப்பட்டுள்ளது.
மார்த்தாண்டத்தை அடுத்த  பாகோடு பகுதியில் நவநீதகிருஷ்ணன் கோயில் உள்ளது. இந்தக் கோயிலில் கடந்த வெள்ளிக்கிழமை பூஜை முடிந்த பின்னர் நடை சாத்தப்பட்டது. சனிக்கிழமை காலை கோயில் பூசாரி நடை திறக்க வந்தபோது கோயிலின் மதில் சுவரில் வைக்கப்பட்டிருந்த உண்டியல் உடைக்கப்பட்டு திறந்து கிடந்தது.
இதுகுறித்து கோயில் நிர்வாகிகளுக்கு பூசாரி தகவல் கொடுத்தார். அங்கு வந்த கோயில் நிர்வாகிகள், சம்பவம் குறித்து மார்த்தாண்டம் காவல் நிலையத்தில் புகார் அளித்தனர்.  காவல் துறையினர் வந்து விசாரணை நடத்தியதில், உண்டியல் உடைக்கப்பட்டு அதில் இருந்த பணம் முழுவதும் திருடப்பட்டிருந்தது தெரிய வந்தது. விரல்ரேகை நிபுணர்களும் வரவழைக்கப்பட்டு, ரேகைகளை பதிவு செய்தனர். இதுகுறித்து காவல்துறையினர் வழக்குப்பதிந்து  விசாரிக்கின்றனர்.