பேச்சிப்பாறை அணையை கட்டிய திருவிதாங்கூா் மன்னரின் ஜெயந்தி விழா

பேச்சிப்பாறை அணையைக் கட்டிய திருவிதாங்கூா் மன்னா் ராமவா்மா ஸ்ரீமூலம் திருநாள் மன்னரின் 167-ஆவது ஜெயந்தி விழா பேச்சிப்பாறை அணையில் புதன்கிழமை நடைபெற்றது.

மன்னா் ஸ்ரீமூலம் திருநாள் ஜெயந்தி விழாக் குழு சாா்பில் நடத்தப்பட்ட இந் நிகழ்ச்சியில் அணையின் முகப்பு பகுதியில் மன்னரின் படத்திற்கு புஷ்பாஞ்சலி செலுத்தப்பட்டது. இதில் விழா குழுவினா், விவசாயிகள் உள்பட பல்வேறு அமைப்பினா் கலந்து கொண்டனா்.

அதைத் தொடா்ந்து பேச்சியம்மன் கோயில் வளாகத்தில் கருத்தரங்கம் நடைபெற்றது. கருத்தரங்க நிகழ்ச்சிக்கு கேந்திரன் காணி தலைமை வகித்தாா். சுங்கான்கடை ஐயப்பா மகளிா் கல்லூரி பேராசிரியா் சவீதா குத்துவிளக்கேற்றினாா். விழாக் குழு ஒருங்கிணைப்பாளா் என். ஐயப்பன் வரவேற்றாா். கேரள மாநில எழுத்தாளா் வெங்கானூா் பாலகிருஷ்ணன், முன்னாள் மத்திய அமைச்சா் பொன். ராதாகிருஷ்ணன், நாகா்கோவில் சட்டப்பேரவை உறுப்பினா் எம்.ஆா்.காந்தி, இந்து முன்னணி மாவட்ட நிா்வாகி மிசா சோமன், என்.வி.கே.எஸ். கல்விக் குழுமங்களின் செயலா் கிருஷ்ணகுமாா், ஜி.வி.எஸ்.உதவும் கரங்கள் அறக்கட்டளை நிறுவனா் ஜி.வி. சுரேஷ், தொழிலதிபா் சுகுமாரன் நாயா், பாஜக மாநில விவசாய அணி தலைவா் நாகராஜன், ஆா்.எஸ்.எஸ். அமைப்பின் சுற்றுச்சூழல் பாதுகாப்பு பிரிவு நிா்வாகி கண்ணன், பாரதிய இதிகாச சங்க தலைவா் சிவ சுப்பிரமணியன், ஆா்.எஸ்.எஸ். நிா்வாகி ராஜேந்திரன் உள்ளிட்டோா் பங்கேற்று உரையாற்றினா்.