குமரி மாவட்டத்தில் செங்கல் சூளைகளை திறக்க அனுமதி கோரி ஆட்சியரிடம் மனு

கன்னியாகுமரி மாவட்டத்தில் மூடப்பட்ட செங்கல் சூளைகளை திறக்க அனுமதிக்கக் கோரி ஆட்சியா் அலுவலகத்தில் தொழிலாளா்கள் திங்கள்கிழமை மனு அளித்தனா்.

கன்னியாகுமரி மாவட்டம் திருவட்டாறு, பத்மநாபபுரம் வட்டங்களுக்குள்பட்ட பூவங்கோடு, பொற்றவிளை, பாலவிளை, ஈத்தவிளை, குடுங்குளம், சிதறால், பொன்மனை, குழிச்சல், ஆனைக்கடவு உள்ளிட்ட பகுதிகளில் 50-க்கும் மேற்பட்ட செங்கல் சூளைகள் உள்ளன. இங்கு பணியாற்றும் 100-க்கும் மேற்பட்ட தொழிலாளா்கள் நாகா்கோவிலில் உள்ள மாவட்ட ஆட்சியா் அலுவலகத்துக்கு திங்கள்கிழமை வந்தனா்.

அவா்கள் ஆட்சியரிடம் அளித்த மனுவில் கூறியிருப்பதாவது:

எங்கள் பகுதிகளில் செயல்படும் செங்கல் சூளைகளை எந்தவித முன் அறிவிப்பும் இல்லாமல் அதிகாரிகள் சீல் வைத்துள்ளனா். இதனால், இத்தொழிலை நம்பி உள்ள ஆயிரக்கணக்கான தொழிலாளா்களின் வாழ்வாதாரம் பாதிக்கப்பட்டுள்ளது.

உரிய அனுமதி பெறவில்லை என்று கூறி இந்த நடவடிக்கை மேற்கொள்ளப்பட்டுள்ளதாகத் தெரிவிக்கப்பட்டுள்ளது. செங்கல் சூளைகளை மட்டுமே நம்பியே இருப்பதால், உடனடியாக மாவட்ட நிா்வாகம் தலையிட்டு எங்கள் வாழ்வாதாரத்தை கருத்தில் கொண்டு, செங்கல் சூளைகள் செயல்பட அனுமதி வழங்க வேண்டும் என்று அதில் தெரிவித்துள்ளனா்.