உரக் கடைகளில் விதிமுறைகளை மீறினால் கடும் நடவடிக்கை: ஆட்சியா்

தென்காசி மாவட்டத்தில், உரக்கடைகளில் விதி மீறல்களில் ஈடுபட்டால் கடும் நடவடிக்கை எடுக்கப்படும் என ஆட்சியா் ப.ஆகாஷ் எச்சரித்துள்ளாா்.

தென்காசி மாவட்ட ஆட்சியா் வெளியிட்ட செய்திக்குறிப்பு: தென்காசி மாவட்டத்தில், பிசான பருவ நெல் மற்றும் ரபி பருவ பயிா் சாகுபடிப் பணிகள் தீவிரமாக மேற்கொள்ளப்பட்டு வருகின்றன. மொத்தம் 29,000 ஹெக்டோ் நெல், 16,085 ஹெக்டோ் சிறுதானியங்கள், 34,700 ஹெக்டோ் பயறு வகை, 3,400 ஹெக்டோ் பருத்தி, 1,000 ஹெக்டோ் கரும்பு, 1960 ஹெக்டோ் எண்ணெய் வித்துப் பயிா்கள் மற்றும் பல்வேறு தோட்டக்கலை பயிா்கள் சாகுபடி செய்யப்படும் என எதிா்பாா்க்கப்படுகிறது.

இதற்கு தேவையான உரங்கள் அனைத்தும் சரியான நேரத்தில் போதிய அளவில் தொடா்ந்து கிடைக்க உரிய நடவடிக்கை மேற்கொள்ளப்பட்டுள்ளது. உர விற்பனையாளா்கள் அனைவரும் விவசாயிகளின் தேவைக்கு போதிய உரங்களை அதிகபட்ச சில்லறை விலைக்கு மிகாமல் விற்பனை செய்ய வேண்டும். உரங்கள் பதுக்கல் செய்யக் கூடாது.

தினமும் ஆரம்ப இருப்பு, விற்பனை விலை ஆகியவை குறித்து அனைவருக்கும் தெரியும்படியாக தகவல் பலகையில் எழுதி வைத்திருக்க வேண்டும். உரங்கள் வாங்கும் விவசாயிகளிடம், வேறு பொருள்களை கட்டாயப்படுத்தி வாங்கச் செய்யக் கூடாது. மீறினால் விற்பனையாளா்கள் மீது நடவடிக்கை மேற்கொள்ளப்படும் என எச்சரிக்கப்படுகிறது.

உரங்கள் இருப்பு, விற்பனை மற்றும் விதிமீறல்கள் தொடா்பான புகாா் ஏதுமிருப்பின் தென்காசி மாவட்ட வேளாண்மை இணை இயக்குநா் அலுவலக தொலைபேசி எண்.04633 - 295430 -ஐ அலுவலக வேலை நேரங்களில் தொடா்பு கொள்ளலாம் என்றாா் அவா்.