அகில இந்திய வேலைநிறுத்தம்: தமிழக ஓட்டுநர் பயிற்சிப் பள்ளி உரிமையாளர் கூட்டமைப்பு ஆதரவு

அகில இந்திய சாலைப் போக்குவரத்து தொழிலாளர்கள் சம்மேளனம் சார்பில் செவ்வாய்க்கிழமை நடைபெறவுள்ள அகில இந்திய அளவிலான போக்குவரத்து தொழிலாளர்கள் வேலைநிறுத்தத்திற்கு தமிழ்நாடு ஓட்டுநர் பயிற்சிப் பள்ளி உரிமையாளர் கூட்டமைப்பு ஆதரவு தெரிவித்துள்ளது.
இதுகுறித்து கூட்டமைப்பின் மாநிலச் செயலர் வைகை குமார் வெளியிட்டுள்ள அறிக்கை: தேசிய அளவில் போக்குவரத்துத் தொழிலை தனியார், பன்னாட்டு நிறுவனங்களுக்கு தாரைவார்த்து, போக்குவரத்துத் தொழிலாளர்களின் வாழ்வாதாரத்தைப் பறிக்கும் மத்திய மோட்டார் வாகன சட்டத் திருத்த மசோதாவை உடனடியாக திரும்பப் பெற வேண்டும். இந்த மசோதாவால் இருசக்கர மற்றும் நான்குசக்கர வாகன மெக்கானிக், டயர் பஞ்சர், டிங்கர், பெயின்டர், பாடி பில்டிங் போன்ற தொழிலில் உள்ள லட்சக்கணக்கான தொழிலாளர்கள் வேலையிழக்கும் அபாயம் உள்ளது.  வாகன விற்பனை, பதிவு, தகுதிச் சான்று போன்றவற்றை இனி பெரு நிறுவனங்களே மேற்கொள்ளும். இது ஆட்டோ, டாக்சி, வேன், லாரி போன்ற வாகன ஓட்டுநர்களுக்கும், உரிமையாளர்களுக்கும் பெரும் பொருள் செலவை ஏற்படுத்தி தொழிலைவிட்டு விலகச் செய்யும் நிலையை ஏற்படுத்தும்.
இக்கோரிக்கையை வலியுறுத்தியும், பெட்ரோல், டீசல் விலையை குறைக்க வேண்டும், சுங்கச்சாவடிகளில் செய்யப்படும் முறைகேடான வசூலை உடனடியாக நிறுத்த வேண்டும் என்பன உள்ளிட்ட கோரிக்கைகளை வலியுறுத்தியும் நடைபெறும் வேலைநிறுத்தப் போராட்டத்தில் எங்கள் கூட்டமைப்பும் பங்கு பெறும் என்றார் அவர்.