நெல்லை ஆட்சியர் அலுவலகத்துக்கு பூலித்தேவன் பெயர் சூட்ட வலியுறுத்தல்

திருநெல்வேலியில் ஆட்சியர் அலுவலகத்துக்கு பூலித்தேவன் பெயரைச் சூட்ட வேண்டும் என முக்குலத்தோர் புலிப்படை மாவட்ட நிர்வாகிகள் ஆலோசனைக் கூட்டத்தில் வலியுறுத்தப்பட்டது.
திருநெல்வேலியில் ஞாயிற்றுக்கிழமை நடைபெற்ற இக்கூட்டத்துக்கு அமைப்பின் மாவட்டத் தலைவர் சேகர்பாண்டியன் தலைமை வகித்தார். மாவட்டச் செயலர் இராஜசேகர் பாண்டியன், மாவட்டப் பொருளாளர் கருப்பசாமி ஆகியோர் முன்னிலை வகித்தனர். கூட்டத்தில், மாநிலப் பொறுப்பாளர் முத்துராமலிங்கம், மாநிலப் பொருளாளர் பெருமாள், மாவட்ட, ஒன்றிய, நகர நிர்வாகிகள் கலந்து கொண்டனர். அமைப்பின் மாநில அமைப்புச் செயலராக நியமனம் செய்யப்பட்டுள்ள சேகர்பாண்டியனுக்கு கூட்டத்தில் பாராட்டு தெரிவிக்கப் பட்டது.
தீர்மானங்கள்: திருநெல்வேலி ஆட்சியர் அலுவலகத்துக்கு பூலித்தேவன் மாளிகை எனப் பெயர் சூட்ட வேண்டும்; ஆறாம் வகுப்பு பாடத் திட்டத்தில் இருந்து நீக்கப்பட்ட பசும்பொன் முத்துராமலிங்கத் தேவர் வாழ்க்கை வரலாற்றை மீண்டும் சேர்க்க வேண்டும்; தீண்டாமை ஒழிப்புச் சட்டத்தில் உச்சநீதிமன்றம் வெளியிட்டுள்ள தீர்ப்பை நடைமுறைப்படுத்த வேண்டும்; மதுரை விமான நிலையத்திற்கு முத்துராமலிங்கத் தேவர் பெயரைச் சூட்ட வேண்டும்; அக். 30இல் நடைபெறும் முத்துராமலிங்கத் தேவர் ஜெயந்தியை முன்னிட்டு அரசு விடுமுறை அளிக்க வேண்டும்; சிலைக் கடத்தல் வழக்கை சிபிஐக்கு மாற்றும் முயற்சியை அரசு கைவிட வேண்டும்; தமிழகத்தில் அனைத்து மாவட்டத்திலும் தேவர் சிலை வைக்க அரசு அனுமதி வழங்க வேண்டும் என்பன உள்ளிட்ட தீர்மானங்கள் நிறைவேற்றப்பட்டன.