தமிழ் வழியில் தேர்வு எழுத அனுமதிக்க கோரிக்கை

தமிழ் வழியில் தேர்வு எழுத அனுமதிக்க வேண்டும் என வலியுறுத்தி திருநெல்வேலி மனோன்மணீயம் சுந்தரனார் பல்கலைக்கழகத்தில் மாணவர்கள் மனு அளித்தனர். 
திருநெல்வேலி மனோன்மணீயம் சுந்தரனார் பல்கலைக்கழகத்தின் உறுப்பு கல்லூரிகளில் ஆங்கில வழியில் இளங்கலை பாடப்பிரிவில் சேரும் மாணவர்கள்,  பல்கலைக்கழகத் தேர்வை தமிழில் எழுதுவது நடைமுறையில் இருந்து வந்தது.
இந்நிலையில், ஆங்கில வழியில் பயிலும் மாணவர்கள் ஆங்கிலத்தில்தான் தேர்வு எழுத வேண்டும் என பல்கலைக்கழகம் அறிவித்துள்ளது. இதற்கு ஆட்சேபம் தெரிவித்து புதன்கிழமை தூத்துக்குடி காமராஜர் கல்லூரி மாணவர்கள் 50-க்கும் மேற்பட்டோர் அபிஷேகப்பட்டியில் பல்கலைக்கழகம் முன் திரண்டனர்.
தேர்வை தமிழில் எழுத அனுமதிக்க வேண்டும் என வலியுறுத்தி மாணவர்கள் கோஷம் எழுப்பினர். பின்னர், மாணவர்கள் குழுவினர் பல்கலைக்கழகப் பதிவாளரை சந்தித்து கோரிக்கை மனு அளித்தனர்.