பொதிகைநகர் ஐயப்பன் கோயிலில் மண்டல பூஜை நாளை தொடக்கம்

பாளையங்கோட்டை, பொதிகைநகரில் உள்ள அருள்மிகு ஐயப்பன் கோயிலில் 21ஆம் ஆண்டு மண்டல பூஜை விழா வெள்ளிக்கிழமை (டிசம்பர் 21) தொடங்கி 27ஆம் தேதி வரை நடைபெறுகிறது.
இக்கோயிலில் ஆண்டுதோறும் மண்டல பூஜை விழா சிறப்பாக நடைபெற்று வருகிறது.  நிகழாண்டுக்கான விழா வெள்ளிக்கிழமை தொடங்குகிறது. அன்று காலை 6 மணிக்கு பொதிகை விநாயகருக்கு கணபதிஹோமம், சுகிர்தஹோமம் நடைபெறுகிறது. சனிக்கிழமை (டிச. 22) காலை 7 மணிக்கு மகா சுதர்சன ஹோமம், இரவு 7 மணிக்கு சனீஸ்வர பூஜை, 108 நீராஞ்சனம், 9 மணிக்கு தீபாராதனை நடைபெறுகிறது. 23ஆம் தேதி காலை 9 மணிக்கு லட்சார்ச்சனை, மாலை 4.30 மணிக்கு 2ஆம் கால லட்சார்ச்சனை, 24 ஆம் தேதி இரவு 7 மணிக்கு சர்வ ஐஸ்வர்ய பூஜை, இரவு 9 மணிக்கு தீபாராதனை, 25ஆம் தேதி காலை 8 மணிக்கு அஷ்டாபிஷேகம், மாலை 6.30 மணிக்கு சந்தியா தீபாராதனை, 26ஆம் தேதி அதிகாலை 5 மணிக்கு கணபதி ஹோமம், முற்பகல் 10.30 மணிக்கு விஷேச ஆயில்ய பூஜை, நூறும் பாலும் நாகர் ஊட்டு நிகழ்ச்சி, இரவு 7 மணிக்கு படி பூஜை, விளக்கு பூஜை, இரவு 8.30 மணிக்கு கும்பேஷ கர்கசரி பூஜை, பிரம்ம கலச பூஜை, சையா பூஜை, கலஸாதி வாசம், அதிபாக ஹோமம் உள்ளிட்டவை நடைபெறுகின்றன.
27ஆம் தேதி அதிகாலை 4 மணிக்கு 108 கலச பூஜை, கஜ பூஜை, காலை 7 மணிக்கு பால்குடம், நெய்குடம் எடுத்தல், 9 மணிக்கு 108 கலசாபிஷேகம், 508 இளநீர் உள்பட 18 வகை அபிஷேகம் நடைபெறுகிறது. மதியம் 1 மணிக்கு அன்னதானம், மாலை 5.30 மணிக்கு ஐயப்பன் வீதியுலா நடைபெறுகிறது. ஏற்பாடுகளை ஐயப்ப சேவா சங்கத்தினர் செய்து வருகின்றனர்.