நெல்லை காய்கனி சந்தைகளில் எலுமிச்சை விலை வீழ்ச்சி

திருநெல்வேலி மாவட்ட காய்கனி சந்தைகளில் எலுமிச்சம்பழங்களின் விலை சரிந்துள்ளது.
திருநெல்வேலி மாவட்டத்தில் சின்னவெங்காயம் கடந்த மே, ஜூன் மாதங்களில் கிலோ ரூ.30 முதல் ரூ.40-க்குள் விற்பனையாகி வந்தது. இந்நிலையில், ஜூலை முதல் நாளிலேயே வரத்து குறைந்ததால் சின்னவெங்காயத்தின் விலை கிலோ ரூ.57ஆக உயர்ந்தது. இந்த வாரத்தில் மேலும் ரூ.3 உயர்ந்து கிலோ ரூ.60-க்கு விற்பனையாகி வருகிறது. இதேபோல மார்ச், ஏப்ரல், மே மாதங்களில் உச்சத்தில் இருந்த எலுமிச்சையின் விலை குறைந்துள்ளது. விளைச்சல் அதிகரிப்பு, சாரல் மழையால் தேவை குறைவு போன்ற காரணங்களால் எலுமிச்சை கிலோ ரூ.30-க்கு மட்டுமே விற்பனையாகிறது. இதனால் குடிசைத் தொழிலாக ஊறுகாய் தொழில் செய்வோர் எலுமிச்சை கொள்முதலை அதிகரித்துள்ளதாக வியாபாரிகள் தெரிவித்தனர். திருநெல்வேலி உழவர் சந்தையில் காய்கனிகளின் ஞாயிற்றுக்கிழமை விலை நிலவரம் (ஒரு கிலோவுக்கு): கத்தரி-ரூ.20, வெண்டைக்காய்-20, தக்காளி-26, அவரைக்காய்-40, கொத்தவரை-20, புடலங்காய்-15, பாகற்காய்-30, பீர்க்கங்காய்-20, சுரைக்காய்-10, தடியங்காய்-17, பூசணிக்காய்-17, தேங்காய்-38, மாங்காய்-20, மிளகாய்-54, முள்ளங்கி-20, எலுமிச்சை-28, நார்த்தை-24, தண்டுக்கீரை-10, அரைக்கீரை-10, குத்துப்பசலைகீரை-10, மணத்தக்காளிகீரை-20, கொத்தமல்லி கீரை-26, கேரட்-38, பீட்ரூட்-40, உருளைக்கிழங்கு-26, செளசெள-18, ரிங் பீன்ஸ்-58, இஞ்சி-74, நெல்லிக்காய்-30, வாழைப்பழம்- 80, மாம்பழம்-60, பப்பாளி-80.