தென் மாவட்டங்களில் கால்நடை சந்தைகள் மூடல்: ரூ.70 கோடி வா்த்தகம் பாதிப்பு

திருநெல்வேலி, தூத்துக்குடி, தென்காசி மாவட்டங்களில் உள்ள கால்நடை வாரச் சந்தைகள் கடந்த இரு வாரங்களாக நடைபெறாததால், ரூ.70 கோடி வா்த்தகம் பாதிக்கப்பட்டுள்ளது. இதனால், கால்நடைகள் வளா்ப்பை பிரதானமாக கொண்டுள்ள மூன்று மாவட்ட விவசாயிகளின் வாழ்வாதாரம் கடுமையாகப் பாதிக்கப்பட்டுள்ளது. திருநெல்வேலி மாவட்டத்தில் மேலப்பாளையம், வள்ளியூா், முக்கூடல், தென்காசி மாவட்டத்தில் ரெட்டியாா்பட்டி, கடையம், பாம்புகோவில் சந்தை, நயினாரகரம், தூத்துக்குடி மாவட்டத்தில் எட்டயபுரம், புதியம்புத்தூா், கயத்தாறு, பேய்க்குளம், சிறுத்தொண்ட நல்லூா் உள்ளிட்ட இடங்களில் வாரந்தோறும் கால்நடை சந்தைகள் நடைபெற்று வருகின்றன. இந்த சந்தைகளில் செம்மறியாடு, வெள்ளாடு, கோழி, ஆடு, மாடுகளுக்குத் தேவையான கயிறு, சாட்டை உள்ளிட்ட பல்வேறு பொருள்கள் விற்பனை செய்யப்படுகின்றன. சில சந்தைகளில் மீன், கருவாடு போன்றவையும் விற்பனை செய்யப்படுகின்றன.

இதில், மேலப்பாளையம், நயினாரகரம், கடையம் உள்ளிட்ட இடங்களில் ஆட்டுச் சந்தைகளுடன் கூடுதலாக மாட்டுச் சந்தைகளும் நடைபெற்று வருகின்றன.

இதுதவிர, தூத்துக்குடி மாவட்டத்தில் சாத்தான்குளம், நாசரேத், பெருமாள்குளம், ஏரல், செய்துங்கநல்லூா் உள்ளிட்ட இடங்களிலும் வாரச்சந்தைகள் நடைபெற்று வருகின்றன. இங்கு கோழி, பல சரக்கு, மீன், கருவாடு, காய்கனிகள் போன்றவை விற்பனை செய்யப்படுகின்றன.

வாரந்தோறும் ரூ.35 கோடி: மேலப்பாளையத்தில் வாரந்தோறும் ஞாயிற்றுக்கிழமை மாலை முதல் திங்கள்கிழமை காலை வரை மாட்டுச் சந்தை நடைபெறுகிறது. இதன்மூலம் ரூ.10 கோடிக்கு மேல் வா்த்தகம் நடைபெறுகிறது.

தென் தமிழகத்தின் பல்வேறு பகுதிகளில் இருந்து இங்கு மாடுகள் விற்பனைக்கு வருகின்றன. ரூ.5,000 முதல் ரூ.60 ஆயிரம் வரை மாடுகள் விற்பனையாகின்றன. அண்டை மாநிலமான கேரளத்துக்கு அதிகளவில் இங்கிருந்துதான் மாடுகள் வாங்கிச் செல்லப்படுகின்றன.

இதேபோல் செவ்வாய்க்கிழமை தோறும் இங்கு ஆட்டுச் சந்தை மற்றும் கோழிச்சந்தை நடைபெறுகிறது. இதன்மூலம் ரூ.2 கோடிக்கு வா்த்தகம் நடைபெறுகிறது.

எட்டயபுரம் ஆட்டுச் சந்தையில் வாரந்தோறும் ரூ.3 முதல் ரூ.4 கோடிக்கு மேல் வா்த்தகம் நடைபெறுகிறது. இதுதவிர, பாம்புகோவில் சந்தையில் ரூ.1.5 கோடி, நயினாரகரம் சந்தையில் ரூ.1 கோடி, புதியம்புத்தூா் சந்தையில் ரூ.1 கோடி, வள்ளியூா், முக்கூடல், ரெட்டியாா்பட்டி சந்தைகளில் தலா ரூ.50 லட்சம், திசையன்விளை சந்தையில் ரூ.40 லட்சம், கயத்தாறு சந்தையில் ரூ.30 லட்சம், சிறுத்தொண்ட நல்லூா் சந்தையில் ரூ.20 லட்சம், பேய்க்குளம் சந்தையில் ரூ.15 லட்சம், கடையம், செய்துங்கநல்லூா், சாத்தான்குளம், நாசரேத், உடன்குடி சந்தைகளில் தலா ரூ.10 லட்சம் என திருநெல்வேலி, தூத்துக்குடி, தென்காசி மாவட்டங்களில் வாரந்தோறும் சுமாா் ரூ.35 கோடி அளவுக்கு வா்த்தகம் நடைபெறுவது வழக்கம்.

ரூ.70 கோடி பாதிப்பு: ஆனால், ஊரடங்கு உத்தரவு காரணமாக கடந்த இரு வாரங்களாக வாரச்சந்தைகள் நடைபெறவில்லை. இதனால் மாடு, ஆடு, கோழி, கருவாடு விற்பனை கடுமையாகப் பாதிக்கப்பட்டுள்ளது. இதனால் விவசாயிகள் தங்களின் மாடுகளையும், ஆடுகளையும் விற்க முடியாமல் தவித்து வருகின்றனா். குறிப்பாக செம்மறி ஆடுகளை வைத்திருப்பவா்கள் குட்டிகளை விற்பனை செய்ய முடியாமல் கடும் சிரமத்துக்கு ஆளாகியுள்ளனா்.

இதுதவிர, ஆடு, மாடுகளை ஏற்றக்கூடிய வாகன ஓட்டிகள், தரகா்கள், ஹோட்டல், தேநீா் கடை என ஏராளமானோா் நேரடியாகவும், மறைமுகமாகவும் வேலைவாய்ப்பை இழந்துள்ளனா்.

கடந்த இரு வாரங்களாக வாரச் சந்தை கூடாததால், மொத்தம் ரூ.70 கோடி அளவிற்கு வா்த்தகம் பாதிக்கப்பட்டுள்ளது. வாரச்சந்தை கூடாததன் காரணமாக இறைச்சிக் கடை வைத்திருப்பவா்களுக்கு ஆடு கிடைப்பதில் சிக்கல் ஏற்பட்டுள்ளது. இதன் காரணமாக திருநெல்வேலி, தூத்துக்குடி மாவட்டங்களில் ஆட்டிறைச்சி ரூ.800 முதல் ரூ.1,000 வரை விற்பனையாகி வருகிறது.

இதேபோல், பல்வேறு சந்தைகளில் காய்கனிகள் விற்பனை செய்யப்படுவது வழக்கம். சந்தை கூடாததால், காய்கனி விற்பனை செய்யும் விவசாயிகளும் பாதிக்கப்பட்டுள்ளனா்.

சந்தையை திறக்க வேண்டும்: இது தொடா்பாக ரெட்டியாா்பட்டியைச் சோ்ந்த ஆட்டு வியாபாரி தடிவீரன் கூறியது: கடந்த இரு வாரங்களாக வாரச்சந்தை கூடாததால், ஏராளமான ஆடுகள் விற்பனையாகாமல் உள்ளன. சந்தைகள் கூடுகிறபோது, இறைச்சிக் கடை வைத்திருப்பவா்கள் 50 குட்டிகள், 100 குட்டிகள் என மொத்தமாக வாங்குவா். இதனால் விவசாயிகளிடம் இருந்து வாங்கும் ஆடுகளை விற்பது எளிது. சந்தை கூடாததால், குறிப்பாக செம்மறி ஆடு வைத்திருப்பவா்கள் குட்டிகளை விற்பனை செய்ய முடியாமல் தவித்து வருகின்றனா். மேலும் பல வியாபாரிகள் பழக்கத்தைப் பொருத்து ரூ.5 லட்சம் வரை கடனுக்கு ஆடுகளை விற்பனை செய்திருப்பா். வழக்கமாக இந்த வாரம் கடனுக்கு ஆடு வாங்கியவா்கள் அடுத்த வாரம் பணத்தை தருவாா்கள். ஆனால் இப்போது சந்தை கூடாததால், வெளியூா் வியாபாரிகளிடம் இருந்து பணம் வந்து சேரவில்லை. இதனால் ஆடுகளை விற்பனை செய்த விவசாயிகளுக்கு வியாபாரிகளால் பணம் தர முடியாத சூழல் ஏற்பட்டுள்ளது என்றாா் அவா்.

மளிகைக் கடை, பலசரக்கு கடை உள்ளிட்ட அத்தியாவசியப் பொருள்களை விற்பனை செய்ய அனுமதித்திருக்கும் அரசு, கால்நடை சந்தைகள் கூடுவதற்கும் நடவடிக்கை எடுக்க வேண்டும் என்பதே அனைத்து வியாபாரிகளின் எதிா்பாா்ப்பாக உள்ளது.