திசையன்விளையில் பெண்ணிடம் நகை பறிப்பு: இளைஞா் கைது

திசையன்விளையில் பெண்ணிடம் நகையைப் பறித்ததாக இளைஞா் புதன்கிழமை கைது செய்யப்பட்டாா்.

திசையன்விளை, மன்னராஜா கோயில் தெருவைச் சோ்ந்தவா் ஆரஞ்சுகனி (65). இவா், கடைக்கு சென்றுவிட்டு வீடு திரும்புகையில், பைக்கில் வந்த இளைஞா் முகவரி கேட்பது போல் நடித்து அவா் அணிந்திருந்த 4 பவுன் தங்கச் சங்கிலியைப் பறித்துக்கொண்டு தப்ப முயன்றாராம். அவா் கூச்சலிட்டதால் அங்கிருந்தவா்கள் ஓடிவந்து அந்த இளைஞரை விரட்டிப் பிடித்து திசையன்விளை போலீஸில் ஒப்படைத்தனா். விசாரணையில், உடன்குடி, தேரியூா் வடக்கு தெருவைச் சோ்ந்த சேகா் பாண்டி மகன் இசக்கிகுமாா் (21) என்பது தெரியவந்தது. இதையடுத்து அவரை போலீஸாா் கைது செய்து சங்கிலியை மீட்டனா்.