நெல்லையில் போக்குவரத்துக்கு இடையூறாக இருந்த ஆக்கிரமிப்புகள் அகற்றம்: மாநகராட்சி ஆணையர்

நெல்லை: நெல்லையில் போக்குவரத்துக்கு இடையூறாக இருந்த ஆக்கிரமிப்புகளை மாநகராட்சி அதிகாரிகள் மற்றும் நெடுஞ்சாலை துறையினர் அகற்றினர். அருள்மிகு நெல்லையப்பர் கோயில் திருத்தேரோட்டம் நடைபெற உள்ளதால் 4 ரத வீதிகளில் உள்ள ஆக்கிரமிப்புகளை விரைவில் அகற்ற நடவடிக்கை மேற்கொள்ளப்படும் என  மாநகராட்சி ஆணையர் சிவ.கிருஷ்ணமூர்த்தி பேட்டியளித்துள்ளார்.

நெல்லை மாநகரப் பகுதிகளில் பெரும்பாலான பகுதிகளில் சாலைகள் ஆக்கிரமிப்புகள் நிறைந்ததாகவே உள்ளது. ஆக்கிரமிப்புகள் அகற்றப்பட்டாலும் அரசியல் செல்வாக்கு காரணமாக ஆக்கிரமிப்பது தொடர்கதையாகவே உள்ளது. மாநகராட்சி பகுதியில் உள்ள  ஆக்கிரமிப்புகளால் பொதுமக்களுக்கும், பொதுப் போக்குவரத்துதிற்கும் பெரும் இடையூறு உள்ளதாக புகார் எழுந்த வண்ணம் இருந்தது. 

இந்த நிலையில் இன்று  வண்ணார்பேட்டை பகுதியில் பொதுமக்களுக்கு மற்றும் போக்குவரத்திற்கு இடையூறாக நெடுஞ்சாலைத்துறை சாலையிலுள்ள ஆக்கிரமிப்புகளை அகற்றும் பணி மாநகராட்சி ஆணையர்  கிருஷ்ணமூர்த்தி தலைமையில் மாநகராட்சி அதிகாரிகள் மற்றும் நெடுஞ்சாலைத்துறை அதிகாரிகள் மேற்கொண்டனர். 

அப்போது சாலைகள் மற்றும் நடைபாதைகளில் உள்ள கடைகள் மற்றும் ஆக்கிரமிப்புகளை அகற்றினர். மாநகர பகுதியில் உள்ள அனைத்து ஆக்கிரமிப்புகள் அகற்றப்படும். இதைத் தொடர்ந்து  மாநகராட்சி ஆணையர் சிவ கிருஷ்ணமூர்த்தி பேசுகையில், ஸ்மார்ட் சிட்டி திட்டத்தின் கீழ் சாலையை விரிவாக்கம் செய்யப்பட உள்ளது. 

மேலும்  சாலைகளில் செல்லும் பொதுமக்களுக்கு இடையூறு இல்லாத வகையில் இருப்பதற்காக இந்த ஆக்கிரமிப்பு அகற்றப்படுகிறது. அதுபோல அருள்மிகு நெல்லையப்பர் கோயிலில் தேரோட்டம் அடுத்த மாதம்  நடைபெற உள்ளதால், தேரோட்டம் நடைபெறும் நான்கு ரத வீதிகளிலும் ஆக்கிரமிப்புகளை அகற்றும் பணி மேற்கொள்ளப்படும் என தெரிவித்தார்