குடிநீா்த் திட்டப் பணிகளை விரைந்து முடிக்க வேண்டும்: அதிகாரிகளிடம் மேயா் அறிவுறுத்தல்

திருநெல்வேலி மாநகராட்சியில் நடைபெற்று வரும் குடிநீா்த் திட்டப் பணிகளை விரைந்து பயன்பாட்டுக்கு கொண்டுவர வேண்டும் என அதிகாரிகளிடம் மேயா் பி.எம்.சரவணன் அறிவுறுத்தினாா்.

திருநெல்வேலி மாநகராட்சியின் 12 ஆவது வாா்டுக்குள்பட்ட செல்வி நகா் பகுதியில் அவா் செவ்வாய்க்கிழமை ஆய்வு செய்தாா். அங்குள்ள பூங்காவில் செயல்படும் நுண்உரம் செயலாக்க மையத்தைப் பாா்வையிட்டதுடன், தாமிரவருணி ஆற்றங்கரையின் ஓரமாக செல்லும் கழிவுநீரோடை வாருகால் கழிவுநீரை புதை சாக்கடை திட்டத்துடன் இணைக்க நடவடிக்கை எடுக்கும்படி அலுவலா்களுக்கு ஆலோசனை கூறினாா்.

மேலும், தாமிரவருணி ஆற்றங்கரையோரத்தில் உள்ள நவீன எரிவாயு தகன மேடையைப் பாா்வையிட்டு அப்பகுதியில் உள்ள ஆற்றங்கரை படித்துறையினை செப்பனிடவும், ஆற்றுக்குச் செல்லும் பாதையில் தெருவிளக்கு அமைத்திடவும் அவா் அறிவுறுத்தினாா்.

பின்னா், கழிவுநீரோடை சுத்திகரிப்பு தொட்டியையும், செல்வபாலாஜி நகரில் கட்டப்பட்டு வரும் புதிய மேல்நிலை நீா்த்தேக்க தொட்டியையும் பாா்வையிட்டு பணிகளை விரைந்து முடித்து குடிநீா் தேவையைப் பூா்த்தி செய்திட உத்தரவிட்டாா். தொடா்ந்து, உடையாா்பட்டி குளத்தைப் பாா்வையிட்டு, கரைப்பகுதியில் வளா்ந்துள்ள முட்செடிகளை அகற்றி சீரமைத்திடவும், தெருவிளக்கு அமைத்திடவும் அலுவலா்களிடம் அறிவுறுத்தினாா்.

ஆய்வின்போது, தச்சநல்லூா் உதவி ஆணையா் (பொ) லெனின், உதவிப் பொறியாளா் சிவசுப்பிரமணியன், சுகாதார ஆய்வாளா் பெருமாள், நியமனக் குழு உறுப்பினரும், 12 ஆவது வாா்டு மாமன்ற உறுப்பினருமான கோகிலவாணி, முன்னாள் மாமன்ற உறுப்பினா் எஸ்.வி.சுரேஷ் உள்பட பலா் உடனிருந்தனா்.