சாந்திநகா் காவலா் குடியிருப்பில் புதிய குடிநீா் குழாய் அமைக்கக் கோரி மனு

பாளையங்கோட்டை சாந்தி நகா் காவலா் குடியிருப்பில் சேதமடைந்த குடிநீா்க் குழாய்களை மாற்றிவிட்டு புதிய குழாய்களை அமைத்து குடிநீா் வழங்கக் கோரி மாநகராட்சி மக்கள் குறைதீா் கூட்டத்தில் மனு அளிக்கப்பட்டது.

இது தொடா்பாக சாந்திநகா் அரசு ஊழியா் - காவலா் குடியிருப்போா் நலச் சங்கத்தினா் அளித்த மனு:

பாளையங்கோட்டை மண்டலம், வாா்டு எண்-5, சாந்திநகா் காவலா் குடியிருப்பில் காவல் துறையினருக்கு சுமாா் 400 வீடுகள் 1984ஆம் ஆண்டு காவலா் வீட்டு வசதி வாரியத்தால் கட்டி கொடுக்கப்பட்டன. அப்போது குடிநீா் குழாய்கள் அமைத்து வீடுகளுக்கு இணைப்பு கொடுக்கப்பட்டன. தற்போது அந்தக் குழாய்கள் சேதம் அடைந்தும், பல இடங்களில் உடைப்பு ஏற்பட்டும் குடிநீரில் சாக்கடை கலந்து துா்நாற்றம் வீசுகிறது. எங்கிருந்து எந்தக் குழாயில் சாக்கடை கலக்கிறது என்பதை கண்டுபிடிக்க முடியவில்லை. குடிநீா் இணைப்புகள் அமைத்து பல ஆண்டுகள் ஆகி விட்டதால் அனைத்து குடிநீா்க் குழாய் இணைப்புகளையும் மாற்றிவிட்டு புதிய குழாய்கள் மூலம் குடிநீா் இணைப்பு வழங்க வேண்டும்.

பாதாள சாக்கடை திட்டத்தில் எங்கள் பகுதியையும் இணைக்க வேண்டும். குடிநீா்த் தொட்டி அமைந்துள்ள இடத்தில் சுற்றுச்சுவா் அமைத்துத் தர வேண்டும்.

குடிநீா்த் தொட்டி அமைந்துள்ள மைதானத்தில் ஆக்கிரமித்துள்ள முள்புதா்களை அகற்ற வேண்டும். தூய்மைப்பணியாளா்கள் தினந்தோறும் வீடுகளில் குப்பைகளை சேகரிக்கவும், சாக்கடை கால்வாய்களையும், தெருக்களையும் சுத்தம் செய்யவும் நடவடிக்கை எடுக்க வேண்டும் எனக் குறிப்பிட்டுள்ளனா்.