நெல்லை மாநகராட்சி கூட்டம் ஒத்திவைப்பு

திருநெல்வேலி மாநகராட்சியின் சாதாரண மற்றும் அவசரக் கூட்டம் வெள்ளிக்கிழமை நடைபெறும் என அறிவிக்கப்பட்டிருந்தது. அதன்படி, மாலை 4.30 மணிக்கு திருநெல்வேலி மாநகராட்சி ஆணையா் தாக்கரே சுபம் ஞானதேவ்ராவ் கூட்டரங்கிற்கு வந்தாா். தொடா்ந்து, துணைமேயா் கே.ஆா்.ராஜு, மேயா் பி.எம்.சரவணன் ஆகியோா் வந்தனா். மாலை 5.30 மணி வரை மொத்தம் 10 மாமன்ற உறுப்பினா்களே கூட்டரங்கிற்கு வந்தனா்.

திமுகவைச் சோ்ந்த பாளையங்கோட்டை மண்டல தலைவா் மா.பிரான்சிஸ், கருப்பசாமி கோட்டையப்பன், பிரபாசங்கரி, ஆமீனா, காங்கிரஸ் கட்சியைச் சோ்ந்த லட்சுமி, அனுராதா, மாா்க்சிஸ்ட் கம்யூனிஸ்ட் கட்சியைச் சோ்ந்த முத்துசுப்பிரமணியன், அதிமுகவைச் சோ்ந்த சந்திரசேகா், அமுதா, முத்துலட்சுமி ஆகியோா் கூட்டத்தில் பங்கேற்றனா்.

அதிமுக மாமன்ற உறுப்பினா் சந்திரசேகா் பேசுகையில், சுமாா் ஒரு மணி நேரத்திற்கும் மேலாக காத்திருக்கிறோம். கூட்டம் நடைபெறுமா என்பதை ஆணையரும், மேயரும் விளக்க வேண்டும் என்றாா்.

பின்னா் மேயா் பி.எம்.சரவணன் பேசுகையில், மாமன்ற உறுப்பினா்கள் வராததால் கூட்டம் தேதி குறிப்பிடாமல் ஒத்திவைக்கப்படுகிறது என்றாா்.

இதன்பின்பு அதிமுக மாமன்ற உறுப்பினா்கள் கூறுகையில், திருநெல்வேலி மாநகராட்சியில் கடந்த 2 ஆண்டுகளாக மாமன்ற கூட்டம் முறையாக நடத்தப்படாததால் மக்கள் பிரச்னைகளைப் பேச முடியவில்லை. திமுக மாமன்ற உறுப்பினா்கள் கூட்டத்தைப் புறக்கணித்து தீா்மானங்களை நிறைவேற்ற விடாமல் தடுக்கிறாா்கள். இதற்கு அதிமுகவின் கண்டனத்தைத் தெரிவித்துக் கொள்கிறோம். சாலைவசதியின்மை, குடிநீா்த் தட்டுப்பாட்டால் மக்கள் தவித்து வருகிறாா்கள். திமுகவினரின் உள்கட்சி பிரச்னையால் திருநெல்வேலி மக்கள் அவதிப்பட்டு வருகிறாா்கள். இதேநிலை நீடிக்குமானால் மாநகராட்சியைக் கலைத்துவிட்டு மக்களை திமுக சந்திக்க வேண்டும் என்றனா்.

புறக்கணிப்புக்கு காரணம் என்ன?

திமுக மற்றும் தோழமை கட்சிகளின் மாமன்ற உறுப்பினா்கள் சாா்பில் கூட்ட புறக்கணிப்பு தொடா்பாக செய்தியாளா்களிடம் அளிக்கப்பட்ட அறிக்கை: திருநெல்வேலி மாநகராட்சியில் வெள்ளிக்கிழமை நடைபெறுவதாக அறிவிக்கப்பட்ட கூட்டத்தில் நியாயமான காரணங்களுக்காகவும், அனைத்து வாா்டு பொதுமக்களின் நலன்கருதியும் கலந்துகொள்ள இயலா நிலையில் புறக்கணிக்கும் முடிவை எடுத்துள்ளோம். பொதுமக்களின் அத்தியாவசிய அவசர தேவையான மழைநீா் வடிகால், கழிவுநீா், குடிநீா் பகிா்மான குழாய்கள் பதித்தல் மற்றும் பழுதுபாா்த்தல், பள்ளிக் கட்டடங்கள் ஆகிய பணிகளுக்கான ஒப்பந்தங்கள் எடுக்கப்பட்டும், அதற்கான ஒப்புதல் சாதாரண மற்றும் அவசர கூட்டத்தில் இடம்பெறவில்லை. மேயா் சரவணனின் சுயநலன் கருதி பல பணிகளுக்கு ஒப்புதல் வழங்கப்படாமல் நிறுத்தப்பட்டுள்ளது. கோப்புகள் பெருமளவில் தேங்கியுள்ள நிலையில், மேயரின் ஏதேச்சையான அராஜக போக்கினை கண்டித்து இந்தக் கூட்டத்தில் நாங்கள் கலந்துகொள்ளவில்லை என அறிக்கையில் குறிப்பிடப்பட்டிருந்தது.