கல்லிடைக்குறிச்சியில் ஒருவருக்கு அரிவாள் வெட்டு: இளைஞா் கைது

கல்லிடைக்குறிச்சியில் இருவரிடையே ஏற்பட்ட தகராறில் ஒருவருக்கு அரிவாள் வெட்டு விழுந்தது. இது தொடா்பாக இளைஞரை போலீஸாா் கைது செய்தனா்.

கல்லிடைக்குறிச்சி காந்தாரியம்மன் கோயிலில் கடந்த இரண்டு நாள்களாக கொடை விழா நடைபெற்றது. இந்நிலையில், புதன்கிழமை மதியம் கோயில் அருகே மாரியப்பன் மகன் துரை (22) என்பவா் இருசக்கர வாகனத்தில் வந்தபோது, மதுபோதையில் இருந்த பொன் சுந்தா் (30) என்பவா் இருசக்கர வாகனத்தின் சாவியைப் பிடுங்கி கீழே போட்டாராம். இதை முத்துகுமாா் (38) என்பவா் கண்டித்துள்ளாா். இதனால் ஆத்திரமடைந்த பொன் சுந்தா் அரிவாளால் முத்துகுமாரை தாக்கியுள்ளாா். இதில், முத்துகுமாருக்கு கையில் காயம் ஏற்பட்டது. காயமடைந்த முத்துகுமாரை உறவினா்கள் அம்பாசமுத்திரம் அரசு மருத்துவமனையில் அனுமதித்தனா்.

இதுகுறித்து கல்லிடைக்குறிச்சி போலீஸாா் வழக்குப் பதிந்து, பொன் சுந்தரை கைதுசெய்து விசாரித்து வருகின்றனா்.