கோவில்பட்டி கோயிலில் ருத்ர ஏகாதசி ஹோமம், சிறப்பு பூஜைகள்

கோவில்பட்டி அருள்மிகு செண்பகவல்லி அம்பாள் உடனுறை பூவனநாத சுவாமி கோயிலில் ஞாயிற்றுக்கிழமை ருத்ர ஏகாதசி ஹோமம் மற்றும் சிறப்பு பூஜைகள் நடைபெற்றன. 
இதையொட்டி, செண்பகவல்லி அம்மன் உடனுறை பூவனநாத சுவாமி கோயில் நடை காலை 5 மணிக்கு திறக்கப்பட்டது. தொடர்ந்து, திருவனந்தல் மற்றும் திருப்பள்ளி எழுச்சி பூஜை நடைபெற்றது.  காலை 8  மணிக்கு அருள்மிகு பூவனநாத சுவாமி சன்னதியில் உலக மக்களின் நன்மைக்காகவும், மழை வேண்டியும் ருத்ர ஏகாதசி ஹோமம் மற்றும் சிறப்பு பூஜை நடைபெற்றது. பின்னர், சுவாமி மற்றும் அம்பாளுக்கு சிறப்பு அபிஷேகம் மற்றும் தீபாராதனை நடைபெற்றது. இதில், ஜனக் கல்யாண் அமைப்பாளர் திருப்பதிராஜா உள்பட திரளான பக்தர்கள் கலந்துகொண்டனர். ஏற்பாடுகளை பிராமண மகா சபையினர் செய்திருந்தனர்.
ஆடிக்கார்த்திகை: ஆடிக்கார்த்திகையை முன்னிட்டு, கோவில்பட்டி செண்பகவல்லி அம்மன் உடனுறை பூவனநாத சுவாமி கோயில் வளாகத்தில் உள்ள ஸ்ரீ வள்ளி தேவ சேனா சமேத சுப்பிரமணிய சுவாமிக்கு காலை 10 மணிக்கு சிறப்பு அபிஷேகம் மற்றும் அலங்கார தீபாராதனை நடைபெற்றது. இரவு 7 மணிக்கு அலங்கார தீபாராதனை நடைபெற்றது. தொடர்ந்து, திருவீதியுலா நடைபெற்றது.