நேர்காணலில் பங்கேற்காத ஓய்வூதியர்களுக்கு ஓய்வூதியம் நிறுத்தப்படும்: மாவட்ட வருவாய் அலுவலர்

தூத்துக்குடி மாவட்டத்தில் இதுவரை நேர்காணலில் பங்கேற்காத ஓய்வூதியதாரர்களுக்கு ஆகஸ்ட் மாதம் முதல் ஓய்வூதியம் நிறுத்தப்படும் என்றார் மாவட்ட வருவாய் அலுவலர் மு. வீரப்பன்.
இதுகுறித்து அவர் வெளியிட்ட செய்திக்குறிப்பு: தூத்துக்குடி மாவட்டத்தில் மாவட்ட கருவூலம் மற்றும் அனைத்து சார்நிலைக் கருவூல அலுவலகங்கள் மூலம்  ஓய்வூதியம் மற்றும் குடும்ப ஓய்வூதியம் பெறும் ஓய்வூதியர்களுக்கு 2018ஆம் ஆண்டுக்கான நேர்காணல் கடந்த ஏப்ரல் மாதம் முதல் நடைபெற்று வருகிறது. 
இந்த நேர்காணலில் இதுவரை பங்கேற்காத ஓய்வூதியர்கள் உடனடியாக தாங்கள் ஓய்வூதியம் பெற்றுவரும் கருவூல அலுவலகத்தில் ஆஜராகுமாறு கேட்டுக்கொள்ளப்படுகிறார்கள். 2018ஆம் ஆண்டுக்கான ஓய்வூதியர் நேர்காணலுக்கு இதுவரை வருகை தராத ஓய்வூதியர்களின் ஓய்வூதியம் ஆகஸ்ட்  மாதம் முதல் நிறுத்தம் செய்யப்படும்.
எனவே, நேர்காணல் முடிக்காத ஓய்வூதியர்கள் உடனடியாக சம்பந்தப்பட்ட கருவூலத்தை தொடர்புகொள்ளும்படி கேட்டுக்கொள்ளப்படுகிறார்கள் எனத் தெரிவிக்கப்பட்டுள்ளது.