விளாத்திகுளம் அருகே மாட்டு வண்டி எல்கை பந்தயம்

விளாத்திகுளம் அருகே பூசனூரில் கோயில் திருவிழாவை முன்னிட்டு மாட்டு வண்டி எல்கை பந்தய போட்டிகள்  நடைபெற்றன. இதில் தூத்துக்குடி, ராமநாதபுரம் மாவட்ட மாட்டு வண்டிகள் முதலிடம் பெற்றன.
விளாத்திகுளம் அருகே பூசனூரில் ஸ்ரீ காளியம்மன் கோயில், ஸ்ரீ தேவி, ஸ்ரீபூமாதேவி சமேத பூர்ண வெங்கடேஸ பெருமாள் கோயில் திருவிழாவை முன்னிட்டு கிராம மக்கள் சார்பில் மாட்டு வண்டி எல்கை பந்தய போட்டிக்கு ஏற்பாடு செய்யப்பட்டு இருந்தது. பெரிய மாட்டு வண்டி, சின்ன மாட்டு வண்டி என 2 பிரிவுகளில் நடைபெற்ற போட்டியில், பல்வேறு மாவட்டங்களில் இருந்து 36 ஜோடி காளைகள் பங்கேற்றன. 12 கிலோ மீட்டர் தூரத்துக்கு நடைபெற்ற பெரிய மாட்டு வண்டி போட்டியில் 15 ஜோடி மாடுகள் பங்கேற்றன. இதில் முதலாவதாக தூத்துக்குடி மாவட்டம் கடம்பூர் எஸ்.வி.எஸ்.பி. கருணாகர ராஜா மாட்டு வண்டியும், இரண்டாவதாக ராமநாதபுரம் மாவட்டம் மருங்கூரைச் சேர்ந்த அப்துல் காதர் மாட்டு வண்டியும், மூன்றாவதாக பூசனூர் பிர்த்திஷா மாட்டு வண்டியும் வெற்றி பெற்றது. 8 கிலோ மீட்டர் தூரத்துக்கு நடைபெற்ற சின்ன மாட்டு வண்டி போட்டியில் 21 ஜோடி காளைகள் கலந்து கொண்டன. இதில் ராமநாதபுரம் மாவட்டம் மருங்கூரைச் சேர்ந்த அப்துல் காதர் மாட்டு வண்டி முதல் இடத்திலும், சிங்கிலிபட்டி சங்குசாமி மாட்டு வண்டி இரண்டாமிடத்திலும், மேலதட்டப்பாறை அய்யனார் மாட்டு வண்டி மூன்றாமிடத்திலும் வெற்றி பெற்றன.
பின்னர் நடைபெற்ற பரிசளிப்பு விழாவில், வெற்றி பெற்ற மாட்டு வண்டிகளின் உரிமையாளர்கள் மற்றும் வண்டிகளை ஓட்டிய பந்தய சாரதிகளுக்கும் பரிசுகள் வழங்கப்பட்டன.