தூய்மைப் பணியாளா்களுக்கு போக்குவரத்து வசதி செய்து தரக் கோரிக்கை

திருச்செந்தூா்: திருச்செந்தூா் பேரூராட்சியில் பணிபுரியும் தூய்மைப் பணியாளா்களுக்கு போக்குவரத்து வசதி செய்து தர கோரிக்கை விடுக்கப்பட்டுள்ளது.

திருச்செந்தூா் சிறப்பு நிலை பேரூராட்சியில் சுகாதாரப் பணிகளுக்காக ஏற்கெனவே உள்ள நிரந்தர மற்றும் தற்காலிக பணியாளா்களுடன், தற்போது நாசரேத் பகுதியிலிருந்து கூடுதலாக 17 தூய்மைப் பணியாளா்கள் வந்து கரோனா தடுப்பு தீவிரப் பணியில் ஈடுபட்டுள்ளனா். ஒப்பந்த அடிப்படையில் பணிபுரியும் இவா்கள் நாளொன்றுக்கு ரூ. 215 வீதம் ரூ. 10 பிடித்தம் போக ரூ.205 பெற்றுக்கொண்டு பணி செய்து வருகின்றனா்.

தற்போது இவா்கள் நாசரேத்திலிருந்து பணிக்கு வர பேருந்து வசதி இல்லாததால் ஆட்டோ மற்றும் இரு சக்கர வாகனத்தில் தினசரி வந்து செல்ல ஒவ்வொருவருக்கும் ரூ. 100 வரை செலவாகிாம்.

இதனால் தங்களுக்கு போக்குவரத்து உள்ளிட்ட அடிப்படை வசதிகளை செய்து தரக் கேட்டு அனைத்திந்திய இளைஞா் பெருமன்ற மாநில பொதுக்குழு உறுப்பினா் பொ.ஜெயக்குமாா் தலைமையில் புதன்கிழமை பேரூராட்சி அலுவலகத்தில் முறையிட்டனா்.

அப்போது செயல் அலுவலா் இல்லாததால் அரசு தங்களுக்கு போக்குவரத்து வசதி செய்து தர வேண்டுமென கோரிக்கை விடுத்தனா்.