தூத்துக்குடியிலிருந்து நெல்லைக்கு பொதுப்போக்குவரத்து தொடக்கம்

மத்திய அரசின் வழிகாட்டுதல்படி, கரோனா ஊரடங்கு ஜூன் 15 வரை நீட்டிக்கப்பட்டுள்ளது. இந்த நிலையில் தமிழகத்தில் உள்ள மாவட்டங்கள் எட்டு மண்டலங்களாக பிரிக்கப்பட்டு மண்டலங்களுக்கு இடையே பொது போக்குவரத்தை 60 சதவிகித பயணிகளுடன் இயக்குவதற்கு தமிழக அரசு அனுமதி அளித்துள்ளது.

திருநெல்வேலி, தூத்துக்குடி இடையே பொது போக்குவரத்து இன்று தொடங்கி நடைபெற்றது. அதன்படி தூத்துக்குடி தற்காலிக பேருந்து நிலையத்திலிருந்து திருநெல்வேலி, திருச்செந்தூர், ஓட்டப்பிடாரம், கோவில்பட்டி உள்ளிட்ட பகுதிகளுக்கு பேருந்துகள் இயக்கப்பட்டன. பேருந்து ஓட்டுநர்கள் கட்டாயம் முகக்கவசம், கையுறை அணிந்திருந்தனர். இதுகுறித்து பேருந்து ஓட்டுநர் குமார் தெரிவிக்கையில், வழக்கம்போல் பணியாளர்கள் பணிக்கு வர உத்தரவு வழங்கப்பட்டுள்ளது. 

ஊரடங்கு உத்தரவு ஜூன் மாதம் வரையும் நீடிக்கப்பட்டுள்ளதால் இரவு 9 மணிக்குள் பணிமனைக்கு திரும்ப எங்களுக்கு உத்தரவிடப்பட்டுள்ளது. மேலும் பயணத்தின் பொழுது பயணிகள் கட்டாயம் முகக் கவசங்கள் அணிந்திருக்க வேண்டும். மேலும் ஓட்டுநர், நடத்துனர்களும் கையுறை முக கவசங்களை அணிய அறிவுரை வழங்கப்பட்டுள்ளது. 

முன்னதாக பணிக்கு வருவதற்கு முன்பு பேருந்து ஓட்டுநர்களுக்கு உடல் வெப்பநிலையை கண்காணித்து சோதனை செய்யப்பட்டது. தூத்துக்குடி நகர பகுதியில் 27 பேருந்துகளும் புறநகர் பகுதிக்கு 22 பேருந்துகளும் இயக்கப்படுகின்றன என்றார்.