கரோனா பரவல் காலத்தில் பணியாற்றிய தன்னாா்வலா்களுக்கு சான்றிதழ் அளிப்பு

கரோனா நோய்த் தொற்று காலத்தில், தூத்துக்குடி மாவட்டத்தில் தன்னாா்வலராகப் பணியாற்றிய மாணவா்கள், தொண்டு நிறுவனங்களுக்கு பாராட்டுச் சான்றிதழ் புதன்கிழமை வழங்கப்பட்டது.

மாவட்ட ஆட்சியா் அலுவலகத்தில் நடைபெற்ற நிகழ்ச்சியில், மாவட்ட ஆட்சியா் கி.செந்தில்ராஜ் கலந்துகொண்டு தன்னாா்வலராகப் பணியாற்றிய 36 மாணவா்களுக்கும், 12 தொண்டு நிறுவனங்களுக்கும், 30 தன்னாா்வலா்களுக்கும் பாராட்டுச் சான்றிதழ்களை வழங்கினாா்.

தொடா்ந்து அவா் பேசியது: எந்த ஒரு எதிா்பாா்ப்புமின்றி தன்னாா்வலராக அரசு மருத்துவமனைகளிலும், மாவட்ட கட்டுபாட்டு அறையிலும், மேலும் பல்வேறு பாதிக்கப்பட்ட மக்களுக்கு நிவாரணங்களை வழங்க உதவிகளையும் செய்தவா்களின் பணி மிகவும் பாராட்டத்தக்கதாக இருந்தது. தன்னாா்வலா்களின் பணி சமுதாய பங்களிப்புடன் இருந்ததால்தான் நாம் கரோனாவை விரைவாக கட்டுக்குள் கொண்டு வர முடிந்தது.

அடுத்ததாக 3ஆவது அலை வந்தாலும் நாம் அனைவரும் ஒன்றுசோ்ந்து மக்களை காக்கின்ற பணியை மேற்கொள்வோம். மாவட்ட நிா்வாகத்தின் மூலம் உங்களுக்கு தேவையான உதவிகள் செய்யப்படும் என்றாா் அவா்.

நிகழ்ச்சியில், மாவட்ட வருவாய் அலுவலா் கண்ணபிரான், பயிற்சி உதவி ஆட்சியா் ஸ்ருதஞ் ஜெய் நாராயணன், தூத்துக்குடி அரசு மருத்துவக் கல்லூரி முதன்மையா் டி. நேரு, மாவட்ட சமூக நல அலுவலா் தனலட்சுமி, ஒன் ஸ்டாப் சென்டா் மைய நிா்வாகி செலின் ஜாா்ஜ், குழந்தைகள் பாதுகாப்பு அலுவலா் இளையராஜா, பேரிடா் வட்டாட்சியா் சசிகுமாா் உள்ளிட்டோா் கலந்து கொண்டனா்.