நாட்டு வெடிகுண்டு தயாரித்து ‘ரீல்ஸ்’ வெளியிட்ட மூவா் கைது

தூத்துக்குடியில் நாட்டு வெடிகுண்டு தயாரித்து வெடிக்கச் செய்து ரீல்ஸ், ஸ்டேட்டஸ் வெளியிட்ட மூவரை போலீஸாா் கைது செய்தனா்.

தூத்துக்குடி, லெவஞ்சிபுரத்தைச் சோ்ந்த அலெக்ஸ் (22), அமுதா நகரைச் சோ்ந்த பிரகாஷ் (23), சுடலை காலனியைச் சோ்ந்த குரு (21) ஆகிய மூவரும் நண்பா்கள்.

அலெக்ஸின் பிறந்த நாளையொட்டி, மூவரும் இணையத்திலிருந்து தகவல்களைத் திரட்டி நாட்டு வெடிகுண்டு தயாரித்து, திறந்தவெளியில் வெடிக்கச் செய்து வெள்ளிக்கிழமை விடியோ வெளியிட்டனா்.

அந்த விடியோவை பிறந்த நாள் வாழ்த்துடன் சோ்த்து வாட்ஸ்ஆப்பில் ஸ்டேட்டஸ் வைத்தும், இன்ஸ்டாகிராமிலும் பதிவிட்டதாகத் தெரிகிறது.

இதுகுறித்து தென்பாகம் காவல் நிலைய போலீஸாா் வழக்குப் பதிந்து மூவரையும் ஞாயிற்றுக்கிழமை கைது செய்தனா். 3 பேரின் வீடுகளிலும் போலீஸாா் சோதனை நடத்தி விசாரணை நடத்தி வருகின்றனா்.