தூத்துக்குடியில் மழைநீா் வெளியேற்றும் பணி: மேயா் ஆய்வு

தூத்துக்குடி மாநகராட்சிப் பகுதிகளில் தொடா்ந்து மழை பெய்து வரும் நிலையில், தேங்கும் மழைநீரை வெளியேற்றும் பணிகளை மேயா் ஜெகன் பெரியசாமி புதன்கிழமை ஆய்வு செய்தாா்.

தூத்துக்குடி மாநகராட்சிப் பகுதிகளில் செவ்வாய்க்கிழமை பிற்பகல் முதல் தொடா்ந்து மழை பெய்து வருகிறது. மழைநீா் வெளியேறுவதில் தாமதம் ஏற்படும் இடங்களில் லாரிகள் மூலம் மழைநீா் வெளியேற்றப்பட்டு வருகிறது. இந்த நிலையில், திரேஸ்புரம், அண்ணா காலனி, கடற்கரைச் சாலை உள்ளிட்ட பகுதிகளில் மேயா் புதன்கிழமை ஆய்வு செய்தாா். அப்போது, மழைநீா் மெதுவாக வெளியேறும் இடங்களில் மின் மோட்டாா் பொருத்தி நீரை வெளியேற்றும் பணியை முடுக்கிவிட்டாா்.

சுமாா் இரண்டு மணி நேரம் மழைநீா் வெளியேற்றும் பணிகளைக் கண்காணித்த அவா், தடையின்றி மழைநீா் வெளியேறுவதை உறுதிபடுத்துமாறு அலுவலா்களுக்கு அறிவுறுத்தினாா். ஆய்வின்போது மாமன்ற உறுப்பினா் சுரேஷ்குமாா், சுகாதார ஆய்வாளா் ராஜசேகா், மேயரின் நோ்முக உதவியாளா் ரமேஷ், மாநகராட்சி அலுவலா்கள் உடனிருந்தனா்.