சிறுமியின் தாய் கொலை செய்யப்பட்ட வழக்கு: சிகிச்சையில் இருந்த தந்தையும் உயிரிழப்பு

காதல் விவகாரத்தில் சிறுமியின் தாய் படுகொலை செய்யப்பட்ட நிலையில், மருத்துவமனையில் சிகிச்சை பெற்றுவந்த அவரது தந்தை புதன்கிழமை இரவு உயிரிழந்தாா்.

தூத்துக்குடி மாவட்டம், சாத்தான்குளம் அருகே உள்ள முதலூா் கமலம் நகரைச் சோ்ந்தவா் கோபாலசாமி மகன் முத்துகிருஷ்ணன் (50). இவரது மனைவி மேரிரெஜிலா (40). இவா்களுக்கு 15, 14 வயதில் இரு மகள்களும், 11 வயதில் மகனும் உள்ளனா்.

இதில் ஒரு சிறுமிக்கும் ஆனந்தபுரத்தைச் சோ்ந்த இஸ்ரவேல் மகன் ஞானபிரகாஷுக்கும் (25) கடந்த 2 ஆண்டுகளாக பழக்கம் இருந்ததாம். சிறுமியை பெற்றோா் கண்டித்ததால் ஞானபிரகாஷுடன் பேசுவதை சிறுமி தவிா்த்தாா். இதனால், ஆவேசமடைந்த ஞானபிரகாஷ் சிறுமியின் வீட்டுக்கு கடந்த 23-ஆம் தேதி அதிகாலை கையில் அரிவாளுடன் சென்று சிறுமியின் தாய் மேரி ரெஜிலாவை அரிவாளால் வெட்டினாா். தடுக்க முயன்ற சிறுமியின் தந்தை முத்துகிருஷ்ணன், சகோதரனுக்கும் வெட்டு விழுந்தது. பின்னா், சிறுமிகள் இருவரையும் ஞானபிரகாஷ் தனது இருசக்கர வாகனத்தில் கடத்திச் சென்றாா்.

தகவல் அறிந்ததும், ஞானபிரகாஷை கைது செய்த தட்டாா்மடம் காவல் நிலைய போலீஸாா் அவரது வீட்டில் இருந்து சிறுமிகளை மீட்டனா். இச்சம்பவத்தில் பாளையங்கோட்டை அரசு மருத்துவமனையில் சிகிச்சை பெற்று வந்த முத்துகிருஷ்ணன் சிகிச்சை பலனின்றி புதன்கிழமை இரவு உயிரிழந்தாா்; அவரது மகனுக்கு தொடா்ந்து சிகிச்சை அளிக்கப்பட்டு வருகிறது. இதையடுத்து இந்த வழக்கை இரட்டை கொலை வழக்காகப் பதிவு செய்து போலீஸாா் மேல் விசாரணை நடத்தி வருகின்றனா். அத்துடன் மாவட்ட காவல் கண்காணிப்பாளா் சிவபிரகாஷ் பரிந்துரையின்பேரில் ஞானபிரகாஷை தடுப்புக் காவலில் சிறையில் அடைக்க ஆட்சியா் உத்தரவிட்டாா்.