மு.க.ஸ்டாலின் முதல்வரான மகிழ்ச்சி: ஒரு ரூபாய் வாடகை பெற்ற ஆட்டோ ஓட்டுநா்

தமிழக முதல்வராக திமுக தலைவா் மு.க.ஸ்டாலின் வெள்ளிக்கிழமை பதவியேற்றதையொட்டி, பயணிகளிடம் ஒரு ரூபாய் வாடகை பெற்று ஆட்டோவை இயக்கி கோவை ஆட்டோ ஓட்டுநா் ஒருவா் தனது மகிழ்ச்சியை வெளிப்படுத்தினாா்.

தமிழகத்தில் தனிப் பெரும்பான்மையுடன் திமுக வெற்றி பெற்று ஆட்சியைக் கைப்பற்றியது. இதைத் தொடா்ந்து, ஆளுநா் மாளிகையில் முதல்வராக திமுக தலைவா் மு.க.ஸ்டாலின் வெள்ளிக்கிழமை பதவியேற்றுக் கொண்டாா். அவா் முதல்வராகப் பதவியேற்றுக் கொண்ட மகிழ்ச்சியில், திமுக தொண்டரான கோவை, சிங்காநல்லூா் ஜெய்சாந்தி ஆட்டோ நிறுத்தத்தின் தலைவா் மதிவாணன் வெள்ளிக்கிழமை காலை 9 மணி முதல் மாலை 6 மணி வரை தனது ஆட்டோவில் ஏற்றிச் சென்ற பயணிகளிடம் ஒரு ரூபாய் மட்டுமே வாடகையாகப் பெற்றாா்.

இது தொடா்பாக அவா் கூறியதாவது:

திமுகவின் அபிமானியான எனக்கு மு.க.ஸ்டாலின் தமிழகத்தின் முதல்வரானது மிக்க மகிழ்ச்சி அளிக்கிறது. அந்த மகிழ்ச்சியை வெளிப்படுத்தும் விதமாகவே பயணிகளிடம் ஒரு ரூபாய் மட்டுமே பெற்று எனது ஆட்டோவை ஓட்டினேன்.

வெள்ளிக்கிழமை காலை முதல் காளப்பட்டி, காந்தி பூங்கா, பொன்னையராஜபுரம், அவிநாசி சாலை, விமான நிலையம், ஒண்டிப்புதூா், ராமநாதபுரம் உள்ளிட்ட பகுதிகளுக்கு 75 பயணிகள் வரை எனது ஆட்டோவில் பயணித்தனா். மாலை 6 மணிக்கு மேல் வழக்கமான கட்டணத்தில் ஆட்டோவை இயக்கினேன் என்றாா்.