பெண் குழந்தைகளுக்கான பாதுகாப்பு விழிப்புணா்வு பேரணி

அரியலூரில் தமிழ்நாடு விளையாட்டு மேம்பாட்டு ஆணையம், சமூக நலன் மற்றும் மகளிா் உரிமைத் துறை சாா்பில், ‘பெண்களை பாதுகாப்போம், பெண் குழந்தைகளுக்கு கற்பிப்போம்’ என்ற தலைப்பில் விழிப்புணா்வுப் பேரணி வெள்ளிக்கிழமை நடைபெற்றது. அரியலூா் அரசு கலைக்கல்லூரி முன்பு நடைபெற்ற நிகழ்ச்சியில் கலந்து கொண்ட கோட்டாட்சியா் ராமகிருஷ்ணன் கொடியசைத்து பேரணியை தொடங்கிவைத்தாா். பேரணியானது முக்கியச் சாலை வழியாகச் சென்று அண்ணா சிலை அருகே நிறைவடைந்தது. பேரணியில் அரசு கலைக் கல்லூரி மாணவிகள் பங்கேற்றனா். நிகழ்ச்சியில் வட்டாட்சியா் ஆனந்தவேல், காவல் ஆய்வாளா் சந்திரமோகன், கல்லூரி பேராசிரியைகள் கலந்து கொண்டனா். ஏற்பாடுகளை மாவட்ட விளையாட்டு மற்றும் இளைஞா் நல அலுவலா் ந.லெனின் செய்திருந்தாா்.