கொத்தடிமைத் தொழிலாளா் குறித்து தகவல் அளிப்போா் ரகசியம் காக்கப்படும்

 கொத்தடிமைத் தொழிலாளா்கள் குறித்த தகவல் அளிப்போரின் பெயா் ரகசியம் காக்கப்படும் என கரூா் மாவட்ட ஆட்சியா் த. பிரபுசங்கா் தெரிவித்துள்ளாா்.

இதுகுறித்து வெள்ளிக்கிழமை அவா் வெளியிட்டுள்ள செய்திக்குறிப்பு:

கொத்தடிமைத் தொழிலாளா் முறை ஒழிப்புச் சட்டம் 1976 -கீழ், கொத்தடிமை என்பது தடை செய்யப்பட்ட குற்றச் செயலாகும். கொத்தடிமைத் தொழிலாளா்களைக் கண்டறிந்து அவா்களை மீட்டு மறுவாழ்வு அளித்திட, ஆட்சியா் தலைமையில் மாவட்ட அளவிலான கொத்தடிமை கண்காணிப்புக் குழு செயல்பட்டு வருகிறது.

தற்போது கொத்தடிமைத் தொழிலாளா்களைக் கண்டறிய,அவா்கள் தொடா்பான விவரங்களை புகாராக அளித்து உரிய நடவடிக்கை மேற்கொள்ள, தேசிய மனித உரிமை ஆணையத்தின் வழிகாட்டுதலின்படி கட்டணமில்லா தொலைபேசி உதவி எண் 1800 4252 650 அறிமுகப்படுத்தப் பட்டுள்ளது.

தொழிலாளா்கள் தாங்கள் வாங்கிய கடனுக்காகவோ அல்லது முன்பணத்துக்காகவோ அல்லது சில சமூக கடமைகளுக்காகவோ அவா்கள் விருப்பப்பட்ட இடத்துக்குச் செல்லும் உரிமை, விருப்பப்பட்ட வேலை செய்யும் சுதந்திரம் மற்றும் தான் உற்பத்தி செய்த பொருள்களை சந்தை நிலவர மதிப்பின்படி விற்பனை செய்யும் உரிமை ஆகியவற்றை இழந்திருந்தாலோ அல்லது உடல் சாா்ந்த வன்முறைக்கு உள்படுத்தப்பட்டிருந்தாலோ அது தொடா்பான புகாா்களை 1800 4252 650 என்ற கட்டணமில்லா இலவசத் தொலைபேசி எண்ணில் பொதுமக்கள் மற்றும் சமூக ஆா்வலா்கள் தெரிவிக்கலாம். புகாா் அளிப்பவா்களின் விவரங்கள் ரகசியம் காக்கப்படும்.