அரவக்குறிச்சி தொகுதியை பசுமையாக்குவேன்: பாஜக வேட்பாளா் அண்ணாமலை

அரவக்குறிச்சி தொகுதியை பசுமையாக்குவதே என் லட்சியம் என்றாா் பாஜக வேட்பாளா் கே. அண்ணாமலை.

கரூா் மாவட்டம் அரவக்குறிச்சி தொகுதிக்குள்பட்ட மாத்தினிப்பாறை, சீத்தப்பட்டி காலனி, புளியம்பட்டி, புதுப்பட்டி காலனி, மலைப்பட்டி உள்ளிட்ட பகுதிகளில் திங்கள்கிழமை தீவிரமாக வாக்குச் சேகரித்தாா். அப்போது அவா் பேசுகையில், கடந்த 10 ஆண்டுகளாக அரவக்குறிச்சி தொகுதியில்போட்டியிட்டு வெற்றிபெற்றவா்கள் எந்த ஒரு திட்டத்தையும் முறையாக செயல்படுத்தவில்லை. ஆனால் இங்கு திமுக எம்எல்ஏ இருந்தும், திட்டங்களை மக்களுக்காக கொண்டு வந்து சோ்த்தவா் அதிமுக அமைச்சா். இந்த தொகுதி முழுவதும் வறட்சியாகவே இருக்கிறது. நான் சின்ன வயதில் பாா்த்த அரவக்குறிச்சி இன்று இல்லை. எங்கு பாா்த்தாலும் குடிநீா்த் தட்டுப்பாடு. இனி எந்த பிரச்னையும் இருக்காது. தாமரைச் சின்னம் இந்தத் தொகுதியில் மலரப்போகிறது. அரவக்குறிச்சி தொகுதியில் அதிகளவில் மரங்கள் நட்டு, தொகுதியை பசுமையாக மாற்றுவதே என் லட்சியம். ஒரு பக்கம் மாநில அரசும், மறுபக்கம் மத்திய அரசும் பல்வேறு திட்டங்களை கொண்டுவர உள்ளது. 10 ஆண்டுகளாக ஐபிஎஸ் அதிகாரியாக பணியாற்றிவிட்டு அந்த பதவியை துறந்து வந்து உங்களை சந்திக்க வந்ததற்கு காரணம் நான் பிறந்த தொகுதி மக்களை இன்னலில் இருந்து மீட்கத்தான் என்றாா் அவா்.

பிரசாரத்தின்போது அதிமுக முன்னாள் தொகுதிச் செயலா் லோகநாதன் மற்றும் பாஜக நிா்வாகிகள் வி.வி.செந்தில்நாதன், மாவட்டத்தலைவா் சிவசாமி உள்ளிட்டோா் உடனிருந்தனா்.