பெரம்பலூா் மாவட்டத்தில் எஸ்ஐஆா் சிறப்பு முகாம்களில் 9,027 விண்ணப்பங்கள்!

பெரம்பலூா் மாவட்டத்தில் கடந்த 27, 28-இல் நடைபெற்ற வாக்காளா் பட்டியல் சிறப்பு முகாம்களில் 9,027 விண்ணப்பங்கள் பெறப்பட்டுள்ளதாக மாவட்ட தோ்தல் அலுவலரும், மாவட்ட ஆட்சியருமான ந. மிருணாளினி தெரிவித்துள்ளாா்.

பெரம்பலூா் சட்டப்பேரவை தொகுதிக்குள்பட்ட அரணாரை ஊராட்சி ஒன்றிய நடுநிலைப்பள்ளி, குரும்பலூா் அரசு மேல்நிலைப் பள்ளியில் சனிக்கிழமை நடைபெற்ற வாக்காளா் பட்டியலில் பெயா் சோ்த்தல், நீக்கம் மற்றும் திருத்தம் செய்வதற்கான சிறப்பு முகாம்களை பாா்வையிட்டு ஆய்வு மேற்கொண்ட அவா் மேலும் கூறியதாவது:

பெரம்பலூா் (தனி) சட்டப்பேரவைத் தொகுதியில் உள்ள 387 வாக்குச்சாவடி மையங்களிலும், குன்னம் சட்டப்பேரவைத் தொகுதியில் உள்ள 345 வாக்குச்சாவடி மையங்களிலும் சனிக்கிழமை சிறப்பு முகாம்கள் நடத்தப்பட்டன.

கடந்த 19-ஆம் தேதி வெளியிடப்பட்ட வரைவு வாக்காளா் பட்டியலில் பெயா் இடம்பெறாதவா்கள் தங்களது பெயரை இணைத்துக் கொள்ள கால அவகாசம் அளித்து இந்த சிறப்பு முகாம் நடைபெறுகின்றன.

அதில் வாக்காளா் பெயா் சோ்த்தல், நீக்குதல், முகவரி மாற்றம் உள்ளிட்டவற்றை திருத்தம் செய்து உரிய அலுவலரிடமோ, சம்பந்தப்பட்ட வட்டாட்சியரகத்திலோ, கோட்டாட்சியரகத்திலோ அளிக்கலாம்.

அதனடிப்படையில், கடந்த 27, 28 ஆகிய தேதிகளில் நடைபெற்ற முகாம்களில் பெரம்பலூா் சட்டப்பேரவைத் தொகுதியில் வாக்காளா் பட்டியலில் பெயா் சோ்க்க 3,347, நீக்கம் செய்ய 30, முகவரி மாற்றம், வாக்காளா் விவரங்கள் திருத்தம், வாக்காளா் புகைப்பட அடையாள அட்டை மாற்றம், மாற்றுத்திறனாளிகள் எனக் குறிப்பிட 1,613 என 5,080 விண்ணப்பங்களும், குன்னம் சட்டப்பேரவைத் தொகுதியில் பெயா் சோ்க்க 2,794, நீக்கம் செய்ய 23, முகவரி மாற்றம், வாக்காளா் விவரங்கள் திருத்தம், வாக்காளா் புகைப்பட அடையாள அட்டை மாற்றம், மாற்றுத்திறனாளிகள் என குறிப்பிட 1,130 படிவங்களும் என 3,947 விண்ணப்பங்களும் என, மேற்கண்ட இரு தொகுதிகளிலும் மொத்தம் 9,027 படிவங்கள் பெறப்பட்டுள்ளன என்றாா் ஆட்சியா்.

இந்த ஆய்வின்போது, பெரம்பலூா் வட்டாட்சியா் பாலசுப்பிரமணியன், குரும்பலூா் பேரூராட்சி செயல் அலுவலா் தியாகராஜன் உள்ளிட்டோா் உடனிருந்தனா்.