வடகிழக்கு பருவமழை: குன்னம், வேப்பந்தட்டை பகுதிகளில் ஆட்சியா் ஆய்வு

வடகிழக்கு பருவமழை தீவிரமடைந்ததை தொடா்ந்து, பெரம்பலூா் மாவட்டம், குன்னம் மற்றும் வேப்பந்தட்டை வட்டத்துக்குள்பட்ட பகுதிகளில் மேற்கொள்ளப்பட்டுள்ள முன்னெச்சரிக்கை நடவடிக்கைகள், வெள்ளம் பாதிக்கப்பட்ட பகுதிகளை மாவட்ட ஆட்சியா் ப. அப்துல் ராசிக் ஞாயிற்றுக்கிழமை பாா்வையிட்டு ஆய்வு மேற்கொண்டாா்.

இந்த ஆய்வில், குன்னம் வட்டம், தொழுதூா் அணைக்கட்டு, கழக்குடிக்காடு அணைக்கட்டு வழியாக லப்பைக்குடிக்காடு வெள்ளாற்றில் நீா் வரத்து அதிகரித்துள்ள பகுதியை பாா்வையிட்டு ஆய்வு மேற்கொண்ட மாவட்ட ஆட்சியா் அப்துல் ராசிக், கரையோர பகுதிகளில் எச்சரிக்கை பதாகைகள் அமைக்க வேண்டும் என சம்பந்தப்பட்ட அலுவலா்களுக்கு உத்தரவிட்டாா்.

தொடா்ந்து, தொழுதூா் அணைக்கட்டை பாா்வையிட்டு ஆய்வு மேற்கொண்டு, நீா்வரத்து நிலவரத்தை சம்பந்தப்பட்ட அலுவலா்களிடம் கேட்டறிந்து, ஆற்றில் வெள்ளப்பெருக்கு ஏற்படும்பட்சத்தில் கரையோரப் பகுதி மக்களை தாமதமின்றி பாதுகாப்பான இடங்களில் தங்கவைக்கத் தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்திய ஆட்சியா், பெரம்பலூா் மாவட்டத்தில் சனிக்கிழமை இரவு கனமழை பெய்ததன் காரணமாக, வேப்பந்தட்டை வட்டத்தில் உள்ள கல்லாற்றிலும், குன்னம் வட்டத்தில் உள்ள வெள்ளாற்றிலும் அதிகளவில் மழைநீா் செல்வதால், ஆற்றின் கரையோரங்களில் வசிக்கும் பொதுமக்கள் பாதுகாப்பான இடங்களுக்குச் செல்லுமாறும், நீா்நிலைகளுக்கு செல்ல வேண்டாம். பொதுமக்களும் பாதுகாப்பாகவும், எச்சரிக்கையாகவும் இருக்குமாறு மாவட்ட ஆட்சியா் அப்துல் ராசிக் தெரிவித்தாா்.

மேலும், வேப்பந்தட்டை வட்டத்துக்குள்பட்ட வி.களத்தூா் பகுதியில் உள்ள கல்லாறு கரையோர பகுதியில் ஆய்வு மேற்கொண்ட ஆட்சியா், கரையோர பகுதிகளிலுள்ள பொதுமக்களை பாதுகாப்பான இடங்களை தங்க வைத்து, அவா்களுக்குத் தேவையான உணவுகளை வழங்குமாறு சம்பந்தப்பட்ட அலுவலா்களுக்கு அறிவுறுத்தினாா்.

இந்த ஆய்வின்போது, மாவட்ட வருவாய் அலுவலா் க. கண்ணன், அரியலூா் மருதையாறு வடிநில உபக்கோட்ட உதவி செயற்பொறியாளா் வீ. செங்கல்வராயன், பெரம்பலூா் நீா்வளத் துறை உதவிப்பொறியாளா் தி. தினகரன், வட்டாட்சியா்கள் சுகுணா (குன்னம்), முத்துமுருகன் (வேப்பந்தட்டை) ஆகியோா் உடனிருந்தனா்.