கொதித்த பால் கொட்டியதில் காயமடைந்த சிறுமி சாவு

டீக்கடையில் கொதிக்க வைத்திருந்த பால் பாத்திரம் தடுமாறி கொட்டியதில், பலத்த காயமடைந்த சிறுமி மருத்துவமனையில் திங்கள்கிழமை உயிரிழந்தார்.

புதுக்கோட்டை மாவட்டம், ஆர். புதுப்பட்டினம் கிராமத்தைச் சேர்ந்த மீனவர் செந்தில்குமாரின் மகள் சீதாலெட்சுமி(11). அங்குள்ள அரசுப் பள்ளியில் 7-ம் வகுப்பு படித்து வந்த இவர், சனிக்கிழமை டீ வாங்குவதற்காக அந்த ஊரில் இருந்த கடைக்கு சென்றுள்ளார்.

அப்போது, டீக் கடையில் உள்ள அடுப்பில் கொதித்துக் கொண்டிருந்த பாலுடன் இருந்த பாத்திரம் எதிர்பாராத விதமாக அருகே நின்றிருந்த சிறுமி சீதாலெட்சுமி மீது கொட்டியது. இதில் பலத்த காயமடைந்த அவர் தஞ்சை அரசு மருத்துவக் கல்லூரி மருத்துவமனையில் அனுமதிக்கப்பட்டு, திங்கள்கிழமை உயிரிழந்தார்.

இதுகுறித்து கோட்டைப்பட்டினம் போலீஸார் விசாரிக்கின்றனர்.